कुश्मा, १९ फागुन । सहकारी रजिष्ट्रारको कार्यालय, गण्डकी प्रदेश, पोखराले पर्वतको कुश्मामा एकदिने अन्तर्क्रिया कार्यक्रम सम्पन्न गरेको छ ।
कार्यालयले आफ्नो नियमन क्षेत्राधिकार भित्रका सहकारी संघ संस्थाहरूको प्रवर्धनका लागि एकदिने अन्तर्क्रिया कार्यक्रम सम्पन्न गरेको हो ।
फागुन १३ गते सहकारिता, सहकारी ऐन नियम तथा समसामयिक विषयमा एकदिने अन्तर्क्रिया गोष्ठी सम्पन्न गरेको जनाइएको छ । अन्तर्क्रिया गोष्ठीको समन्वय जिल्ला सहकारी संघ, पर्वतले गरेको थियो । कार्यक्रम सहकारी रजिष्ट्रार भेषराज रिजालको अध्यक्षता र कुश्मा नगरपालिकाका उपप्रमुख स्वस्थानी रिजालको प्रमुख आतिथ्यतामा सम्पन्न भएको थियो ।
कार्यक्रममा जिल्ला प्रशासन कार्यालय, पर्वतका सहायक प्रमुख जिल्ला अधिकारी गणेशप्रसाद पौडेल र कुश्मा नगरपालिकाका प्रमुख प्रशासकीय अधिकृत नेत्रप्रसाद पौडेलको उपस्थिति रहेको थियो । त्यसैगरी जिल्ला प्रहरी कार्यालय, पर्वतका कार्यालय प्रमुख प्रहरी उपरीक्षक रवीन विष्ट, सहकारी संघ, पर्वतका अध्यक्ष शेषराज रेग्मी र कुश्मा नगरपालिकाको सहकारी शाखा प्रमुख राधादेवी शर्मा, जिल्ला सहकारी संघ र जिल्ला बचत तथा ऋण सहकारी संघका पदाधिकारीका साथै पर्वत जिल्लाका विभिन्न सहकारी संस्थाका ११५ जनाको सहभागिता रहेको जनाइएको छ ।
कार्यक्रमको उद्घाटन गर्दै प्रमुख अतिथि उपप्रमुख रिजालले सहकारीलाई उत्कृष्ट व्यावसायिक संस्था बनाउन सञ्चालक लगायतका जिम्मेबार पदाधिकारीहरू इमान्दारी बन्नुपर्ने बताइन् । उनले कोपोमिस तालिम लिएर पनि सहकारीका तथ्यांक सिष्टममा इन्ट्री नगर्ने प्रवृत्तिले सहकारी सुशासन प्रवर्धन नहुने भन्दै कुश्मा नगरपालिका अन्तर्गतका समस्यामा परेका सहकारीलाई सहजीकरण गर्ने प्रतिबद्धता समेत व्यक्त गरिन् ।
अन्तर्क्रियामा कुश्मा नगरपालिकाका सहकारी संघ संस्थाहरूको अवस्था, समस्या र समाधानका उपाय, सम्पत्ति शुद्धीकरण निवारण र ऋण लगानी तथा ऋण असुली सम्बन्धी कार्यपत्रहरू प्रस्तुत गरिएको थियो । सहभागीहरूले विगतका अन्तक्र्रिया गोष्ठी र तालिममा उठान भएका सबै विषय कार्यान्वयन नभएकाले कार्यान्वयन गर्नुपर्ने, अनुगमन नियमन बढाउनुपर्ने, ऋण उठ्न कठिन भएपछि सहकारीमा समस्या पर्न थालेकोले ऋण उठाउने रणनीति बनाउनुपर्ने, कार्यक्षेत्र र प्रकृति मिल्दा सहकारी एकीकरणमा जान उचित हुने विचार राखेका थिए ।
त्यसैगरी सहभागीले निष्क्रिय सहकारी संस्थाहरू अद्यावधिक नहुँदा र केही सहकारी समस्या उन्मुख हुँदा राम्रा सहकारीहरूमा समेत समस्या परेकोे विश्लेषण गरेका थिए ।
सहकारीहरूको ऋण लगानी र असुली कार्यका प्रक्रियागत कुराहरूमा एकरूपता हुनुपर्ने तथा संस्थाहरूबीच लाभांश वितरण, व्याजदर निर्धारण, ऋण लगानी, सदस्यता प्रदान जस्ता क्रियाकलापहरूमा अस्वस्थ्य प्रतिस्पर्धा गर्न नहुने विषयमा समेत चर्चा भएको थियो ।
