बागलुङ, १७ फागुन । आइतबारदेखि बागलुङमा तेस्रो जेसीज कप फुटबल प्रतियोगिता आयोजना हुने भएको छ । गण्डकी प्रदेश स्तरीय फुटबल प्रतियोगितामा ११ टिमको सहभागिता रहने आयोजकले जनाएको छ ।
सामाजिक कार्यमा अग्रसर बागलुङ जेसीसले आइतबार अर्थात भोलिदेखि २४ गतेसम्म तेस्रो संस्करणको फुटबल कप आयोजना गर्न लागेको हो । युवाहरुको क्षमता र नेतृत्व विकासमा सक्रिय रहेको बागलुङ जेसीजले विभिन्न युवा केन्द्रीत तथा समाज रुपमान्तरणका कार्य गर्दै आएको छ ।
पछिल्लो समयमा युवाहरुकै आकर्षणको रुपमा रहेको फुटबल खेललाई प्रवद्धन गर्ने उद्देश्यका साथ हरेक वर्ष प्रतियोगिताको आयोजना गर्ने बागलुङ जेसीजका अध्यक्ष सुशान्तकृष्ण श्रेष्ठले जानकारी दिए ।
प्रतियोगितालाई फरक सन्देश दिने उद्देश्यका साथ वातावरण संरक्षणको सन्देश पनि प्रवाह गर्ने अध्यक्ष श्रेष्ठले बताए । उनले फुटबललाई वातावरण संरक्षणको विषयसँग जोड्दै ‘एक गोल, एक वृक्ष, एक खेलाडी एक वृक्ष र एक सदस्य एक वृक्ष अभियान संचालन गरिनेछ र प्रतियोगिताबाट हुने मुनाफाको केही हिस्सा वातावरण संरक्षण कार्यमा लगानी गरिने अध्यक्षले जानकारी दिए ।
प्रतियोगितामा करिव १२ लाख रुपैयाँ खर्च लाग्ने आयोजकले जनाएको छ । प्रतियोगिताको प्रथम पुरस्कार २ लाख रुपैयाँ, ट्रफि, मेडल र प्रमाणपत्र रहेको छ भने द्धितीय पुरस्कार १ लाख रुपैयाँ, ट्रफि, मेडल र प्रमाणपत्र रहेको छ ।
त्यस्तै सेमिफाईनलमा पुग्ने टिमलाई नगर १५/१५ हजार रुपैयाँ, फियर प्ले टिमलाई ५ हजार रुपैयाँ र ट्रफि, उत्कृष्ट खेलाडीलाई ५ हजार रुपैँया र ट्रफि, उत्कृष्ट फरवार्डलाई ३ हजार रुपैँया र ट्रफि, उत्कृष्ट मिडफिल्डरलाई ३ हजार रुपैँया र ट्रफि, उत्कृष्ट डिफेन्डरलाई ३ हजार रुपैँया र ट्रफि, उत्कृष्ट गोलरक्षकलाई ३ हजार रुपैँया र ट्रफि तथा मेन अफ दि म्याचलाई नगद १ हजार रुपैँया र ट्रफिको व्यवस्था गरिएको बागलुङ जेसीजका महासचिव सुलभ खड्काले जानकारी दिए ।
प्रतियोगिताको क्रममा हुने सक्ने सम्भावित दुर्घटनालाई मध्यनगर गरी नेको इन्स्युरेन्सले खेलाडीको १ लाख बराबरको विमा गरिदिने आयोजकले जनाएको छ ।
पत्रकार सम्मेलनमा नेपाल पत्रकार महासंघ बागलुङका उपाध्यक्ष सुवास आचार्यले युवाहरुको आर्कषणको रुपमा रहेको फुटबल खेललाई बागलुङ जेसीजले निरन्तरता दिएको बताए ।
बागलुङ जेसीजका अध्यक्ष सुशान्त कृष्ण श्रेष्ठको अध्यक्षता, महासचिव सुलभ खड्काको संचालनमा कार्यक्रम सम्पन्न भएको थियो ।
