बागलुङ, २४ असार । बागलुङका ६ वटा सरकारी कार्यालयको संयुक्त रुपमा सार्वजनिक सुनुवाइ कार्यक्रम सम्पन्न भएको छ ।
जिल्ला प्रशासन कार्यालय बागलुङ, कृषि ज्ञान केन्द्र बागलुङ, भेटेरीनरी अस्पताल तथा पशु सेवा विज्ञ केन्द्र बागलुङ, प्रधानमन्त्री कृषि आधुनिकीकण परियोजना बागलुङ, मालपोत कार्यालय बागलुङ र नापी कार्यालय बागलुङबाट प्रवाह भएका सेवाहरुका विषयमा सार्वजनिक सुनुवाई गरिएको हो ।
कार्यक्रममा विषयगत कार्यालयका प्रमुख तथा प्रतिनिधिले आ-आफ्ना कार्यालयको प्रगति प्रतिवेदन र सेवा प्रवाहको बारेमा जानकारी दिएका थिए । प्रतिवेदन प्रस्तुत गरेपछि प्रतिवेदनका आधारमा कार्यालयको सेवाको विषयमा सवाल जवाफ भएको थियो । सार्वजनिक सुनुवाइमा उपस्थित नागरिक, तथा सरोकारवालाहरुले सरकारी कार्यालयको सेवा प्रवाहका विषयमा प्रश्न गरेका थिए ।
प्रशासनबाट पाउने सेवा चुस्तदुरुस्त नभएको, नागरिकतामा आमाको नाम उल्लेख गर्न अझैपनि कठिनाई रहेको, मालपोतमा जग्गा नामसारी र राजश्य वुझाउदा झन्झट हुने गरेको, वास्तविक कृषकले कृषि अनुदान पाउन नसकेको र सरकारी कार्यालयमा कर्मचारीले समयमा काम नगर्ने गरेको गुनासो गरेका थिए ।
जिल्ला समन्वय समितिको बागलुङका प्रमुख अमर बहादुर थापाले हरेक सरकारी निकाय पारदर्शी र नागरिक प्रति जवाफदेही हुनुपर्ने बताउनु भयो । उहाँले सुशासन कायम हुँदामात्र जनताले प्रभावकारी सेवा पाउने बताउनुभयो ।
बागलुङका प्रमुख जिल्ला अधिकारी नेत्र प्रसाद सुवेदीको अध्यक्षता , कृषि ज्ञान कार्यालय बागलुङका प्रमुख राजेश्वर सिलवालको स्वागत र पत्रकार तारानाथ आचार्यको सञ्चालनमा सम्पन्न भएको थियो ।
