म्याग्दी, २० जेठ । म्याग्दीको मंगला गाउँपालिका –१ मा अवस्थित रहेको दीपशिखा माध्यमिक विद्यालयले तरकारी खेती गर्ने काम सुरुवात गरेको छ ।
विद्यालयले आफ्नो १ रोपनी ७ आना जग्गामा तरकारी खेती गर्नका लागि झाँडी सफा गर्ने, खनजोत गर्ने र मल बोक्ने जस्ता काम सम्पन्न गरेको छ । अब तरकारीका बिरुवा लगाउने काम मात्र बाँकी रहेको छ ।
आइतबार बिहान विद्यार्थी तथा फोरेष्टी क्लबकी अध्यक्ष सुस्मिता वि.क साथीहरुसँग विद्यालयसँगै रहेको तरकारीबारीमा व्यस्त रहेकी थिइन् । पढाइ सँगसँगै तरकारी खेती गर्नका लागि विद्यालयले जग्गा उपलब्ध गराएपछि खाली रहेको जग्गालाई सदुपयोग गरेर तरकारी खेती गर्न शुरु गर्न गरिएको क्लबकी अध्यक्ष विकले बताइन् । ‘हाम्रो यस कार्यलाई विद्यालयका शिक्षकहरुले पनि सघाउनुभएको छ । अब हामीले यहाँ खाली रहेको जग्गालाई सदुपयोग गरी कृषि उत्पादनमा जोड दिन्छौ ।’ विकले भनिन् ।
विद्यार्थीलाई पिस क्रप्सका प्रतिनिधिले प्राविधिक तालिम पनि दिइरहेको विद्यालयका प्रधानाध्यापक नन्द बहादुर खत्रीले बताए । ‘उनले अहिले हामीले परीक्षणका रुपमा केही जग्गा उपलब्ध गराएका छौ, उत्पादन राम्रो भएमा हामीले विद्यालयमा छलफल गरेर थप जग्गा पनि उपलब्ध गराउनेछौँ । यदि सोचेजस्तो राम्रो उत्पादन भएमा दिवा खाजाको रुपमा समेत प्रयोग गर्छौ’ खत्रीको भने ।
विद्यार्थीलाई प्रयोगात्मक तथा व्यवहारिक सिकाइतर्फ केन्द्रित गर्नु र आफूलाई आवश्यक पर्ने तरकारी आफ्नै खेतबारीमा उत्पादन गरेर स्वावलम्बी बन्नु यस कार्यको उद्देश्य रहेको विद्यालयका सहायक प्रधानाध्यापक हरिकृष्ण उपाध्यायको भनाइ रहेको थियो ।
विद्यालयको यस कार्यलाई सम्पूर्ण शिक्षक, विद्यार्थी तथा अभिभावकले प्रशंसा गरेका छन् । पढाइ सँगसँगै व्यवहारिक रुपमा खेती गर्न पाएकोमा सम्पूर्ण विद्यार्थीहरु पनि खुसी भएका छन् ।
