बागलुङ, १३ जेठ । बागलुङमा आईतबारदेखि प्रथम आदर्श कप फुटबल प्रतियोगिता सुरु भएको छ ।
विद्यामन्दिर स्पोर्टस् क्लबको आयोजना र आदर्श विद्यामन्दिर माविको सहआयोजनामा आयोजित प्रतियोगिताको पहिलो दिन आदर्श विद्यामन्दिर विद्यालय ‘पहिलो’, गुराँस विद्या सदन र अमर आदर्श आवासिय माध्यमिक विद्यलायले विजयी सुरुवात गरेका छन् ।
आयोजक आदर्श विद्यामन्दिर माविले उद्घाटन खेलमा गरिमा आवासिय माध्यमिक विद्यालयलाई २–० गोलअन्तरले पराजित गरेको छ । आदर्शको जितमा खेलको पाँचौं मिनेटमा सुमिप शाही र दोस्रो हाफको २१ औं मिनेटमा सुझाव बानियाँले गोल गरेका थिए ।
यस्तै आईतबारको दोस्रो खेलमा गुराँस विद्या सदनले आत्मघाती गोलको मद्धतमा धौलागिरी माध्यमिक विद्यालयलाई १–० गोलले पराजित गरेको छ । धौलागिरीका डिफेन्डर सुवोधजंग कार्कीले खेलको तेस्रो मिनेटमा गरेको आत्मघाती गोलको मद्धतमा गुराँसलाई फाइदा पुगेको हो । निर्धारित समयमा दुवै टिमबाट गोलको केही अवसर सिर्जना गरेपनि गोल हुन नसक्दा गुराँस विजयी हुँदै क्वाटरफाइनलमा प्रवेश गरेको छ ।
तेस्रो खेलमा अमर आदर्श आवासिय माध्यमिक विद्यालयले कुँडुले माध्यमिक विद्यालयलाई ३–० गोलअन्तरले पराजित गरेको छ । अमर आदर्शको जितमा जोयस पुन, विमल खत्री र अंश केसीले गोल गरेका थिए ।
प्रतियोगिताको दोस्रो दिन (सोमबार) रुद्रेपिपल माविविरुद्व सिद्वार्थ शिक्षा सदन, फ्युचर ब्राइटरविरुद्व सनराईज, पर्वत माविविरुद्व न्यु एभरेष्ट एकेडेमी, आयोजक आदर्श ‘सेतो’विरुद्व न्यु ओयसिस एकेडेमी प्रतिस्पर्धा गर्नेछन् । १५ टोली सहभागी प्रतियोगिताको विजेताले नगद ६६ हजार ६ सय ६६ रुपैयाँ र उपविजेताले ३३ हजार ३ सय ३३ रुपैयाँसहित ट्रफी, मेडेल र प्रमाणपत्र पाउने छन् । प्रतियोगितामा उत्कृष्ट खेलाडि, मिडफिल्डर, गोलरक्षक, डिफेन्डर, उच्च गोलकर्ता र वेष्ट स्ट्राइकरलाई विधागत रुपमा पुरस्कृत गरिने आदर्श विद्यामन्दिर स्पोर्टस् क्लबका अध्यक्ष राजेश केसीले जानकारी दिए ।
प्रतियोगिताको उद्घाटन जैमिनी नगरपालिकाका उप–मेयर हरिहर शर्माले गर्नुभएको थियो । सो अवसरमा बोल्दै उप–प्रमुख शर्माले खेलमार्फत संसार जित्न सकिने भन्दै त्यसको आधार तयार भने प्रारम्भिक तहबाटै गर्नुपर्ने बताए । आदर्श विद्यामन्दिर स्पोर्टस् क्लबका अध्यक्ष राजेश केसीको अध्यक्षतामा सम्पन्न उद्घाटन कार्यक्रमको संचालन शिक्षक युनिस दिन मियाँले गरेका थिए ।
