बागलुङ । बागलुङ जिल्ला लिग फुटबल प्रतियोगितामा पावर फिटनेश क्लब समुह ‘क’को शीर्ष स्थानमा उक्लिएको छ । बुधबार पावर फिटनेशले बागलुङ कालिका युवा क्लब (बागलुङ सुधार केन्द्र)लाई १–० गोलअन्तरले पराजित गर्दै समुह ‘क’को शीर्ष स्थानमा उक्लिएको हो ।
पावर फिटनेशको लागि खेलको ६६ औं मिनेटमा मिलन केसीले गरेको गोल निर्णयक बन्यो । जितसँगै पावर फिटनेशको दुई खेलमा चार अंक रहेको छ । पावर फिटनेश पहिलो खेलमा कालिका भगवती युवा क्लबसँग बराबरीमा रोकिएको थियो ।
बागलुङ कालिकाको दुई खेलमा तीन अंक रहेको छ । बागलुङ कालिकाले पहिलो खेलमा रुद्रेपिपल युवा क्लबलाई पराजित गरेको थियो ।
लिग अन्तर्गत बुधबारको अर्को खेल कालिका भगवती युवा क्लब र रुद्रेपिपल युवा क्लब विचको खेल बर्षाका कारण स्थगित भएको छ । उक्त खेल बिहिबार विहान ८ बजे हुने बागलुङ जिल्ला फुटबल संघका अध्यक्ष जय राजभण्डारीले जानकारी दिए ।
यस्तै बिहिबार दिउँसो पहिलो खेल रामरेखा युवा क्लब र वीर गोर्खाली युवा क्लब विच हुनेछभने दोस्रो खेल गुठी युनाईटेड क्लब र बाल जीवन खेलकुद क्लब (चिल्ड्रेन लाईफ स्पोर्टस् क्लब) विच हुनेछ ।
