बागलुङ, २८ बैशाख । बागलुङ युनिटी क्लब बढुवा भई आगामी वर्ष हुने जिल्ला लिगका लागि छनौट भएको छ ।
शुक्रबार बाङगेचौर खेल मैदानमा सम्पन्न भएको नकआउट चरणको फाइनल खेलमा संयुक्त चार युवा क्लबलाई ३-० को गोल अन्तरले पराजित गर्दै युनिटी क्लब जिल्ला लिगमा बढुवा भएको हो ।
निकै प्रतिष्पर्धात्मक भएको खेलमा स्टार स्ट्राइकर विविध थापा र सन्दीप भण्डारीले टोलीका लागि महत्वपूर्ण योगदान गरेका थिए । खेलको २७ औं मिनेटमा गोल गर्दै वरदान थापा मगरले टोलीलाई अग्रता दिलाएका थिए । त्यस्तै खेलको ३० औं मनिेटमा सन्दीप भण्डारीले गोल गर्दै अग्रतालाई दोब्बर बनाएका थिए । त्यस्तै गरी थापाले पुन व्यक्तिगत दोस्रोे गोल गर्दै अग्रतालाई तेब्बर बनाएका थिए ।
तीन गोलले पछि परेपछि निराश बनेको संयुक्त चारले दोस्रो हाफमा खेलमा फर्कने प्रयास गरेपनि गोल भने गर्न सकेन् । विजेता टोली युनिटीले ट्रफी प्राप्त गरेको जिल्ला फुटबल संघका अध्यक्ष जय राजभण्डारीले जानकारी दिए । जिल्ला लिगमा बढुवाका लागि नकआउट चरणमा युनिटी, संयुक्त चारसंगै तमान युवा क्लब, अमर आदर्श क्लब, आदर्श विद्यामन्दिर खेलकुद क्लब र बागलुङ एकता क्लबले प्रतिष्पर्धा गरेका थिए ।
