काठमाण्डौं, २२ बैशाख । तेस्रो अमिन राष्ट्रिय म्युजिक अवार्ड २०८१ बाट सर्वोत्कृष्ट मोडलको उपाधी कलाकार तथा मोडल प्रेम थापाले जितेका छन् ।
नेपाल संगीत उद्योग संघले प्रदान गर्ने ‘अथक शान्त साधक विश्वनाथ केडिया’ तेस्रो अमिन राष्ट्रिय म्युजिक अवार्ड २०८१ बाट थापालाई सर्वोत्कृष्ट मोडलको उपाधी प्रदान गरिएको हो । “नेपाली गीत, सङ्गीत र संस्कृति संरक्षणको अभियान, व्यवसायीक एकता सहितको हाम्रो पहिचान” भन्ने मुल नाराका साथ संचालित म्युजिक अवार्ड २०८१ को ग्राण्ड फिनालेबाट थापाले सर्वोत्कृष्ट मोडलको उपाधी हात पारेका हुन ।
थापाले सर्वोत्कृष्ट मोडलको उपाधी जाम सुस्तै सुस्तै बेनी बजारमा शीर्षकको लोकदोहोरी गीतबाट प्राप्त गरेका हुन् । छनोटमा पाँचओटा गीत परेका थिए जसमध्ये थापाले अभिनय गरेको जाम सुस्तै सुस्तै बेनी बजारमा शीर्षकको लोकदोहोरी गीत सर्वोत्कृष्ट भएको थियो ।
बागलुङको तित्याङमा जन्मिएका थापा विगत एक दशक देखी गीत सङ्गीत र मोडलिङ क्षेत्रमा अनवरत रुपमा लागिरहेका एक होनहार प्रतिभा हुन् । उनले दर्जन भन्दा बढी गीतमा आफ्नो अभिनय क्षमता प्रदर्शन गरिसकेका छन् । यसका साथै सर्वोत्कृष्ट निर्देशकको रुपमा तिमी र म जाम माया गीतका निर्देशक काजिस श्रेष्ठले उपाधी प्राप्त गरेका छन् । कार्यक्रममा सङ्गीतका विभिन्न २९ विधाका कलाकार तथा स्रस्टाहरुलाई अवार्ड तथा सम्मान प्रदान गरिएको थियो ।
कार्यक्रममा पूर्व प्रधानन्यायाधिस खिलराज रेग्मीले सबै अवार्ड विजेतालाई सम्मान गरेका थिए ।
