बागलुङ, १४ बेशाख । वनको लागेको डढेलो निभाउने क्रममा बागलुङमा एक जनाको जलेर मृत्यु भएको छ ।
घरदेखि करिब एक किलोमिटर पश्चिम जंगलको गोरेटो बाटोमा लागेको डढेलो निभाउने क्रममा तमानखोला गाउँपालिका–२ सिलगुमका ४८ वर्षिय देवसिंह कामीको जलेर घटनास्थलमै मृत्यु भएको हो ।
सिलगुमस्थित पाखोबारी तथा जंगलामा लागेको डढेलो निभाउने क्रममा सोही ठाउँका ३१ वर्षिय ज्ञान बहादुर बुढा मगर र ३३ वर्षिय प्रेम बहादुर घर्ति मगर घाइते भएका छन् । उनीहरुको अनुहार, खुट्टा र शरीरका विभिन्न भाग जलेको जिल्ला प्रहरी कार्यालय बागलुङका प्रहरी नायव उपरीक्षक विजय यादवले जानकारी दिए । घाइतेहरुको उपचार प्राथमिक स्वास्थ्य केन्द्र बुर्तिवाङमा भईरहेको छ । उनका अनुसार, घाइतेको अवस्था मध्यम छ ।
सोही आगलागीबाट तमानखोला २ सिलगुमकै ५२ वर्षिय राम बहादुर कार्कीको जस्ताले छाएको दुईतले ढुंगेघर र गोठ, ४० वर्षिय सुर्य बहादुर सिर्पालीको दुईतले गोठ जलेर नष्ट भएको छ । आगलागीबाट पशुचौपायामा पनि क्षति पुगेको छ ।
तमानखोलाको सिलुगमबाट शुरु भएको डढेलो ढोरपाटनसम्म फैलिएको छ । ढोरपाटन नगरपालिका वडा नं. ३ गुजास्थित खगेन्द्र विकको दुईतले कच्ची घरगोठ, ढाल बहादुर पुनको दुईतले कच्ची र बल बहादुर घर्तिको एकतले गोठ जलेर नष्ट भएका छन् । आगोबाट हुने क्षति कम गर्न स्थानीयको सहयोगमा प्रहरीले आगो निभाउने प्रयास गरिरहेको यादवले जानकारी दिए ।
