बागलुङ, १३ बैशाख । धौलागिरी अस्पतालका प्रमुख मेडिकल सुपरिटेण्डेन्ट (मेसु) डा. रविरञ्जन प्रधानमाथि अस्पताल व्यवस्थापन समितिका सदस्यले अभद्र व्यवहार गरेका छन् ।
व्यवस्थापन समितिका सदस्य कृष्ण शंकर श्रेष्ठले बिहिबार दिउँसो करिब ४ः३० बजेको समयमा कार्यकक्षमै पुगि मेसु प्रधानमाथि हातपातको प्रयास गरेको बताइएको छ । उनीमाथी अभद्र व्यवहार गर्नुको कारण भने खुल्न सकेको छैन ।
आफूमाथि अभद्र व्यवहार भएपछि मेसु प्रधानले कार्वाहीको माग गर्दै जिल्ला प्रशासन कार्यालय बागलुङमा उजुरी दिएका छन् ।
आफू डिउटीमा रहेको समयमा अभद्र व्यवहार भएको भन्दै अस्पताल व्यवस्थापन समितिका सदस्य श्रेष्ठलाई कार्वाहीको माग गर्दै उजुरी दिएका हुन् । श्रेष्ठले मेसु प्रधानमाथि पटक–पटक अभद्र व्यवहार गर्दै आएको बताइन्छ ।
यस बारेमा सहायक प्रमुख जिल्ला अधिकारी चित्राङ्गत बरालले अभद्र व्यवहार गर्नेलाई कानुन बमोजिमको कार्वाही हुने बताए । ‘हामी कहाँ निवेदन परेको छ, अहिले छलफलमा छौँ ।’ उनले भने–‘अभद्र व्यवहार गर्नेलाई कानुन बमोजिम कार्वाही हुन्छ ।’
उनले डाक्टरको सुरक्षाको लागि आफू प्रतिबद्ध रहेको बताउँदै कार्वाहीको लागि प्रक्रिया अघि बढाइने बताए ।
