काठमाडौं, १ असार। आईसीसी विश्वकप एकदिवसीय छनोटको आफ्नो अन्तिम अभ्यास खेलमा नेपाल विजयी भएको छ । जिम्बावेको हरारे स्पोर्ट्स क्लबमा बिहीबार भएको खेलमा नेपालले ओमानलाई दुई विकेटले हराएको हो ।
पहिला ब्याटिङ गरेको ओमानले दिएको २६८ रनको लक्ष्य नेपालले ४४ दशमलव ५ ओभरमा ८ विकेट गुमाउँदै पूरा गरेको हो ।
नेपालका कुशल भुर्तेलले सर्वाधिक १०१ रनको योगदान दिएका थिए। त्यस्तै भुर्तेलले ९४ बल खेल्दै १३ चौका र २ छक्काको मद्दतमा १०१ रन बनाएका थिए ।
यस्तै नेपालका लागि भीम सार्कीले ७४ बलमा ५६, कप्तान रोहितकुमार पौडेलले २८ बलमा ३१ र दीपेन्द्रसिंह ऐरीले २२ बलमा २६ रन जोडे, आसिफ शेखले २४ बलमा २३ रन बनाएका थिए भने कुशल मल्ल १७ रनमा आउट भएका थिए ।
ओमानका लागि अकिब ईलियासले ४ र फैयाज बटले दुई विकेट लिएका थिए ।
त्यसअघि टस जितेर पहिले ब्याटिङ गरेको ओमानले ४९ दशमलव २ ओभरमा सबै विकेट गुमाउँदै २६७ रन बनाएको थियो । ओमानका लागि कप्तान जिशान मकसुदले १०६ बलमा १०९ रनको शतकीय इनिङ खेलेका थिए भने सोयब खानले ६८ बलमा ३८ रन बनाएका थिए ।
नेपालका लागि सोमपाल कामीले ५ विकेट लिएका थिए भने सन्दीप लामिछानेले ३ विकेट हात पारेका थिए । करण केसी र प्रतिश जिसीले समान १÷१ विकेट लिएका थिए।
एक दिवसीय विश्वकप छनोट खेल आगामी असार ३ गतेदेखि जिम्बावेमा सुरु हुँदैछ । विश्वकप छनोटको पहिलो खेलमा नेपालले असार ३ गते घरेलु टोली जिम्बावेसँग खेल्दैछ ।
