यात्री बाइकको च्यासिस गुड्दागुड्दै भाँच्चियो, पूरानो फोटो भनेर कम्पनीले गर्यो झुठो दाबी

तर, कम्पनीले भने उक्त फोटो अहिलेको नभएर पूरानो भएको दाबी गरेको छ । सोमबार सामाजिक सञ्जाल फेसबुकबाटै जानकारी दिँदै कम्पनीले उक्त फोटो परीक्षणकालको भएको दाबी गरेको छ । ‘परिस्थितिको सन्दर्भ बिना नै हाम्रो बाईकको केही तस्विरहरु इन्टरनेटमा प्रसार भइरहेका छन् । यो परीक्षणको लागि प्रयोग भएको मोटरसाइकल हो, ग्राहकले किनेको वा ग्राहकलाई बिक्रि गरिएको मोटरसाइकल होइन ।’ कम्पनीको पोष्टमा उल्लेख छ ।

तर, च्यासिस भाँच्चिएको यात्री मोटरसाइकलको उक्त फोटो पूरानो नभएर नयाँ नै भएको पुष्टी भएको छ । फोटो खिच्ने जयराम तिवारीले पनि उक्त फोटो सोमबार नै खिचेको दाबी गरेका छन् । ‘हामी दुई जना बालाजु बाइसधारातिर हिँड्दै आइरहेका थियौँ । बालाजु चोक कटिसकेपछि नयाँ बजारतिरबाट बालाजु चोक जानेतर्फ बाइक लम्पसार परेको थियो । मैले त खासै याद गरेको थिइन । सँगै भएको बाबुले ‘यात्री बाइक–यात्री बाइक’ भन्यो, अनि ठ्याक्क गइयो ।’, उनले भने, ‘बाइक रोडबाट पेटीपट्टी उकालेको रहेछ । अनि त्यहीबेला फोटो खिचेको हो ।’

यतिमात्र होइन, तिवारीले खिचेको उक्त फोटोको मेटाडेटा जाँच गर्दा पनि उक्त फोटो सोमबार दिउँसो ३ बजेर ८ मिनेट ४३ सेकेण्डमा काठमाडौंको बालाजु क्षेत्रमा नै खिचिएको पाइएको छ । तिवारीले आइफोन १४ प्रोबाट २२ मे २०२३ अर्थात सोमबार नै उक्त फोटो खिचेको पाइएको हो । तर, कम्पनीले उक्त फोटो परीक्षणकालको हो भनेर गरेको दाबी भने झुटो साबित भएको छ ।

गत बैशाख १० गते प्रधानमन्त्री पुष्पकमल दाहाल (प्रचण्ड)को निर्देशनमा नेपालमा नै उत्पादन भएका सवारी साधनको दर्तासम्बन्धि कानुनको तयारी गर्न र नेपाली उत्पादनलाई प्रोत्साहन गर्ने नीति अख्तियार गरी कानुन नै बनाएर यात्रीलाई नम्बर प्लेट दिएको थियो ।