काठमाडौं, १५ फागुन । आईसीसी क्रिकेट विश्वकप लिग टू अन्तर्गत आज भएको पपुवा न्युगिनीविरुद्धको खेलमा नेपाली खेलाडी प्रतिश जिसीले विकेट लिएका छन् ।
टस जितेर फिल्डिङ गरेको नेपालका लागि प्रतिशले ३३.३ ओभरमा पपुवा न्युगिनीका हिरीहिरीलाई दीपेन्द्र सिंह ऐरीबाट क्याचआउट गराएका हुन् । उनको यो एकदिवशीय अन्तर्राष्ट्रिय क्रिकेटमा पहिलो विकेट हो ।
१८ वर्षीय तीव्र गतिका बलर प्रतिश प्युठानमा जन्मिएका हुन् । तर, उनले घरेलु प्रतियोगितामा वागमती प्रदेशका लागि खेल्दै आएका छन् ।
आईसीसी विश्वकप क्रिकेट लिगको त्रिदेशीय शृंखलामा पपुवा न्युगिनी (पीएनजी)ले नेपाललाई दुई सय चार रनको लक्ष्य दिएको छ।
एकदिवसीय मान्यता बचाउन बाँकी आठमध्ये पाँच खेल जित्नै पर्ने दबाब छ। यस्तै, एकदिवसीय विश्वकपको ग्लोबल छनोटमा पुग्न नेपाललाई बाँकी आठै खेलमा जित निकाल्नु पर्ने दबाब छ।
यो लिग २ को दोस्रो अन्तिम त्रिदेशीय शृंखला हो । नेपाल र पीएनजीसँगै घरेलु टिम यूएई सम्मिलित यो शृंखलामा नेपालले बिहीबार यूएईसँग खेल्ने छ। यस्तै, शुक्रबार पीएनजी र आगामी सोमबार यूएईसँग खेल्दै लिग २ अन्तर्गत अन्तिम भ्रमण टुङ्ग्याउने छ।
नेपालमा मार्च ९ देखि सुरु हुने शृंखलामा पनि नेपालसँगै पीएनजी र यूएई नै सहभागी हुनेछन्। स्कटल्यान्ड यसअघि नै च्याम्पियन बनिसकेको छ भने ओमान दोस्रो र नामिबिया तेस्रो स्थानमा छन्। यूएसए चौथो तथा यूएई पाँचौं स्थानमा छ। नेपाल पाँचौं तथा पीएनजी छैटौं स्थानमा छ।
