बागलुङ्, १५ फागुन । बाग्लुङ् नगरपालिका ९ तित्याङ् (साविक वडा न. ५) का ज्ञान बहादुर जि.सीले जीवनको ऊर्जासिल समय नेपाली सेनामा बिताउनुभयो ।
१६ वर्ष नेपाली सेनामा कार्य गरेर हवल्दार पदमा २०६९ सालमा सेवा निवृत्त(पेन्सन) हुनुभयो ।
आफ्नो व्यक्तिगत आवश्यकता र पारिवारीक जिम्मेवारीको बोध गरी कामको खोजीमा वैदेशिक यात्रा(मलेसिया) तय गर्नुभयो तर सोचेजस्तो सफलता भने प्राप्त गर्न सक्नुभएन् ।
आफ्नो गाउँघरमा गाईभैसी, भेडा, बाख्राको गोठालो गर्दा सानो मान्छे गनिने, इज्जत नहुने सोच, बिदेश पुगेपछि परिवर्तन भयो । उहाँले व्यवसायिक बाख्रा कसरी पाल्न सकिन्छ भन्ने शिक्षा प्राप्त गरेर नेपाल फर्केपछि विदेशी भूमिमा गर्नुपरेको पीडा बिर्सिदै अहिले गाँउमै स्वरोजगार बन्नुभएको हो ।
जि.सी नेपाल फर्केर गाउँमै आधुनिक खोर निर्माण गरी व्यवसायिक बाख्रा पालन गर्न थाल्नुभएको छ । उहाँले स्थानीय र बोयर जातका गरी ४० वटा बाख्रा पाल्नुभएको छ । विगत पाँच बर्षदेखि जि.सीले बाख्रा पालन व्यवसाय सुरु गर्नुभएको हो । खोर निर्माण तथा बाख्रा खरिद गर्दा करिव १० लाख रुपियाँ लगानी भएको जि.सीले बताउनुभयो । उहाँले बार्षिक १५ वटासम्म बोका विक्री गर्दै आउनुभएको छ । एउटा बोका २० देखि ३० हजार रुपियाँसम्म विक्री हुन्छ ।
खसी बोका उत्पादन गर्न सके बजारको कुनै पनि समस्या नभएको उहाँले बताउनुभयो । मेहनत र परिश्रम गरे आफ्नै ठाउँमा आम्दानी गर्न सकिन्छ । कुनै पनि कामलाई सम्मान गर्न सके त्यसले जीवन जिउने कला सिकाउने जि.सीको भनाई रहेको छ ।
उहाँले भन्नुभयो–‘सबैले सबैको कामलाई सम्मान गरौँ, काम सानो ठुलो हुँदैन ।’ उहँले आर्यन कृषी तथा पशु फर्म दर्ता गरेर सञ्चालन गर्नुभएको छ । बाख्रा पालनसँगै त्यसैको जुतो पनि बिक्री हुन्छ । गाँउघरमा तरकारी, गोलभेडा खेती गर्न तथा खेतबारीमा प्रयोग गर्न गाँउलेले जुतो लैजाने गरेको जि.सीले बताउनुभयो ।
जि.सीले दुई वटा उन्नत बोयर जातको बोका लिएर उन्नत जातका बाख्राको संख्या वृद्धि गर्न थालेको बताउनुभयो ।
गाँउमै केहि गर्छु भन्ने म जस्ता कृषकलाई स्थानीय निकाय, वडा कार्यालय तथा नगरपालिकाको कार्यालय कसैबाट पनि आर्थिक सहयोग तथा अनुदान प्राप्त हुन नसक्दा भने दुख लागेको उहाँले बताउनुभयो । कृषकका लागि पनि अभिभावक बन्न स्थानीय निकायलाई उहाँले आग्रह गर्नुभयो ।
