काठमाडौं, १५ फागुन । देशको पहाडी भेगमा आज पनि हल्का वर्षाको सम्भावना रहेको मौसम पूर्वानुमान महाशाखाले जनाएको छ । उच्च पहाडी तथा हिमाली भेगमा भने हिमपातको पनि सम्भावना रहेको छ ।
हाल नेपालमा पश्चिमी वायुको सामान्य प्रभाव रहेको छ । साथै प्रि मनसुन सुरु हुनुभन्दा अगाडिको गतिविधि सक्रिय छ । त्यसैकारण आइतबार देशका अधिकांश जिल्लाहरुमा मेघगर्जनसहित यस वर्षको पहिलो हिउँदे वर्षा भएको थियो ।
बेलुकादेखि रोकिएको वर्षा सोमबार (आज) दिउँसो पुनः सुरु हुने सम्भावना रहेको मौसमविदले बताएका छन् । जल तथा मौसम विज्ञान विभागको मौसम पूर्वानुमान महाशाखाका मौसमविद सञ्जीव अधिकारीले काठमाडौं लगायत देशका अधिकांश जिल्लाहरुमा आज दिउँसो पनि हल्का वर्षाको सम्भावना रहेको जानकारी दिए ।
उनका अनुसार आज प्रदेश १, बागमती र गण्डकी प्रदेशका पहाडी भागका थोरै स्थानहरूमा तथा लुम्बिनी, कर्णाली र सुदूरपश्चिम प्रदेशका पहाडी भागका एक(दुई स्थानमा मेघगर्जनसहित हल्का वर्षाको सम्भावना छ ।
साथै उच्च पहाडी तथा हिमाली भूभागका थोरै स्थानहरूमा हल्का हिमपातको सम्भावना पनि रहेकाले आवश्यक सतर्कता अपनाउन र मौसम सूचना तथा पूर्वानुमानमा अद्यावधिक रहन महाशाखाले अनुरोध गरेको छ ।
