काठमाडौं, १७ माघ । शिवशिखर बहुउद्देश्यीय सहकारीले आफ्ना सेवाग्राहीलाई नआत्तिन आग्रह गरेको छ । भक्तपुरमा मुख्य कार्यालय रहेको यो सहकारीले एक विज्ञप्ति जारी गर्दै आर्थिक मन्दीका कारण केही समस्या आएको भएपनि प्रचार गरिएजस्तो नभएको भन्दै बचतकर्तालाई अफवाहको पछि नलाग्न आग्रह गरेको हो ।
विज्ञप्तिमा भनिएको छ, आर्थिक मन्दीले केही समस्या आएको भएपनि केहीले धमिलो पानीमा माछा मार्ने प्रयास गर्दै यस सहकारी विरुद्ध अनर्गल प्रचार गर्ने र ग्राहक तथा सेवाग्राहीलाई भड्काउने गरेको भेटिएको छ । त्यस्ता अफवाहको पछि नलाग्न आग्रह गर्दै हाम्रा ग्राहकहरूलाई ढुक्क हुन आग्रह गर्छौ र सम्पूर्ण बचतकर्ताको रकम सुरक्षित रहेको ग्यारेन्टी गर्न चाहन्छौँ ।
विज्ञप्तिमा अगाडि भनिएको छ, एक दशक भन्दा लामो समयदेखि ग्राहकको सेवामा समर्पित यस शिवशिखर बहुउद्देश्यीय सहकारी संस्था बैंकिङ प्रक्रियामै आउन नसकेका हजारौं नेपाली नागरिकलाई सहज र विश्वासिलो वित्तीय सेवा प्रदान गर्दै आइरहेको छ । ग्राहककै विश्वास र रोजाइका कारण एक दशकमा देशव्यापी संजाल विस्तार गर्न सफल भएको यथार्थ कसैबाट छिपेको छैन ।
भक्तपुरको कौशलटारमा मुख्य कार्यालय रहेको शिवशिखर बहुउद्देश्यीय सहकारी संस्था लिमिटेडको देशभरि ३५ वटा शाखा कार्यालय सञ्चालनमा रहेको जनाएको छ ।
विज्ञप्तिमा भनिएको छ, सञ्चालनको एक दशकसम्म हाम्रा सम्पूर्ण सेवाग्राही तथा ग्राहकलाई सन्तुष्ट राख्न पाउँदा र बचतकर्ताको विश्वास जित्न पाउँदा हामी गर्व गछौँ । ग्राहकको विश्वास र सञ्चालकको जिम्मेवारीले नै सहकारी यो अवस्थामा आइपुग्न सफल भएको हो । तर विडम्बना पछिल्लो केही समयदेखि देशले भोगिरहेको आर्थिक मन्दीले सबैतिर पारिरहेको असरबाट यो संस्था पनि अछुतो रहन सकेको छैन र समस्या भोग्ने संस्थाहरूको अपवाद बन्न सकेको छैन यो यथार्थ लुकाउनुपर्ने कुनै पनि कारण छैन र वास्तविकता घाम जस्तै छर्लङ्ग छ । यसको बाबजुद पनि यस सहकारीमा बचतकर्ताको रकम सुरक्षित छ ।
सहकारीका प्रमुख कार्यकारी लिलानाथ गौतमले बचतकर्ताको रकम सुरक्षित रहेको जनाएका छन । उनले सहकारीमा बचतकर्ताको रकम सुरक्षित रहेको र फिर्ता लिन चाहानेहरुको रकम फिर्ता गर्ने समेत उल्लेख गरेका छन ।
गौतमले पछिल्लो समय केहि सहकारीले गरेको बदमासीका कारण सदस्यहरू डराएको बताउँदै भन्छन्, सबै जना सदस्यहरू एकै पटक सहकारीमा रहेको बचत भिक्न चाहिरहनु भएको छ र नियमित बचत गर्दै आउनुभएका ग्राहकहरु पनि ढुक्कसंग सहकारीमा रकम जम्मा गर्न सकिरहनुभएको छैन । यसले गर्दा देशैभरिका शाखाहरुमा एकैपटक असर देखिएको हो । यो असर देखिनुलाई हामीले कत्ति पनि अस्वभाविक ठानेका छैनौं ।
उनी भन्छन्, बचतकर्ताले गरेको वचत चाहेको बेला निकाल्न पाउनुपर्छ । तर अहिले आर्थिक मन्दि र सहकारीले गरेको लगानी उठ्न नसकिरहेका कारण केही समस्या आएको छ ।
शिवशिखर सहकारीले मुलुकका विभिन्न स्थानमा २० वटा गार्डेन मार्ट सञ्चालनमा ल्याएको छ भने सहकारी र मार्टमा गरी १ हजार भन्दा बढिले प्रत्यक्ष रोजगारी पाइरहेका छन् ।
