वलेवा, २१ कार्तिक । राष्ट्रिय जनमोर्चाको प्रभाव बागलुङ, प्युठान, अर्घाखाँचीलगायतका जिल्लामा अझै कायम छ । ती क्षेत्रमा बहुदलपछि राष्ट्रिय जनमोर्चाको दबदबा नै थियो । जनमोर्चाको लहरकै कारण विगतमा कतिपय बिर्सनै नसक्ने दुखद घटना पनि भएका थिए ।
ती घटना अहिले पनि कतिपयले बिर्सन सकेका छैनन् । त्यस्तै एउटा घटनाले कांग्रेसलाई अहिले पनि झस्काइरहन्छ । जुन घटना बागलुङको हो । २०४६ सालको परिवर्तनपछि जनमोर्चाका कार्यकर्ताहरुले आफूहरुलाई निकै ठूलो सास्ती दिने गरेको बागलुङस्थित कांग्रेसका स्थानीय नेता कार्यकर्ता बताउँछन् ।
आइतबार सोही घटनाका प्रत्यक्षदर्शी यमलाल कंडेलले एक फोटो सार्वजनिक गर्दै घटनालाई पुनः स्मरण गराएका छन् । जापानमा रहेका कंडेलले सामाजिक संजालमा पोस्ट गरेको फोटोमा तत्कालीन जनमोर्चाका कार्यकर्ताले कांग्रेस कार्यकर्ताको टाउको फुटाएको दर्दनाक अवस्था देखिन्छ । सो घटनामा कांग्रेसका नेताहरुको सामूहिक हत्या प्रयास भएको जानकारहरु बताउँछन् ।
सो घटना २०५४ साल चैत महिनाको हो । तत्कालीन दमेक गाविसमा भएको निर्वाचनमा जनमोर्चाका नेता परी थापाका भाइ लाल बहादुर थापा र नेपाली कांग्रेसका प्रेम सापकोटा स्थानीय निर्वाचनमा गाविसको अध्यक्षमा उम्मेदवार थिए । दमेक गाविस जनमोर्चा ९मसाल० को पकड गाउँको रुपमा चर्चित थियो । पहिलो चरणको निर्वाचनमा जनमोर्चाका कार्यकर्ताहरुले अवरोध गरे पछि स्थागित भएको थियो । दोस्रो चरणमा हुने मतदान हुने दुई दिनअघि नेपाली कांग्रेसका जिल्ला नेताहरुको टोली चुनावी प्रचारमा सामेल हुन दमेक पुगेका थिए ।
टोलीमा नेपाली कांग्रेस पूर्व जिल्ला सभापति गोविन्द कंडेल, पार्टी सभापति मणिभद्र कंडेल, नेताहरु रामप्रसाद आचार्य र टंक कडेल सुन्तलाचौर तर्फ जाँदै थिए । उनीहरु गाउँमा पुगेको खबर पाएपछि कांग्रेसको टोलीमाथि हत्याको प्रयास गरिएको एक प्रत्यक्षदर्शीले अहिले पनि सम्झना गर्छन् । आक्रमणकारीले नेता गोविन्द कंडेल र मणिभद्र कंडेललाई मरासन्न हुने गरी कुटेका थिए ।
गोविन्द कंडेल बेहोस थिए । मणीभद्र, टंक र गोविन्द कंडेलको टाउको फुटेको थियो । उनीहरु मरिसकेको भन्दै जनमोर्चाका कार्यकर्ताले बारीमा फालेर हिँडेका थिए । रामप्रसाद आचार्य भने सो घटनामा भाग्न सफल भएका थिए । बारीमा घाइते अवस्थामा हरेको बेला स्थानीय एक परिवारमा विवाहमा जान लागेका जन्तिहरुले उनीहरुको उद्धार गरेका थिए ।
तत्कालिन नेविसंघको नेता लिलाधर कंडेल र तत्कालिन रेडियो नेपालका बाग्लुङ प्रतिनिधि नारायण कंडेलले जंगलबाटो हुँदै लुकीछिपी कुस्मीशेरा पुगेर औषधि ल्याएर प्राथमिक उपचार गराएपछि गोविन्द कंडेल होसमा आएका थिए । पछि फुटेको टाउकोमा ब्याण्डेज लगाएर रायडाडाको बाटो हुँदै जिल्ला सदरमुकाम बाग्लुङमा उनीहरुलाई उपचारका लागि पठाएको थियो । मणिभद्र कंडेल अहिले गण्डकी प्रदेशका पर्यटन मन्त्री छन् । गोविन्द कंडेल र टंक कंडेल नेपाली कांग्रेसका पूर्व सांसद समेत हुन् ।
नेपाली कांग्रेसका कार्यकर्ताको मानसपोटलमा अहिले पनि जनमोर्चाले दिएको यातना पटक पटक स्मरण गर्छन् । नेपाली कांग्रेस बाग्लुङका नेता तथा पूर्व सांसद गोविन्द कंडेलका छोरा शेखर कंडेलले सामाजिक संजाल फेसबुक मार्फत अहिलेका मित्रहरुले उति बेलाको के ख्याल गर्ने त ‘लोकतन्त्र तेसै आएको हो नि त भन्दै व्यंग्य गरेका छन् ।
उनले भनेका छन्, ‘मसालले टाउको फुटाए अहिले तिनैसंग गिलास फुटाउँदै हिँडेका छन् हाम्रा कांगेसी साथीहरु ।’ यम कंडेलले भनेका छन्, ‘मैले लिएको फोटो हो, म पनि थिएँ । राजनीतिको सहकर्मी नेतागणलाई स्मरणमा रहोस्, रातारात दमेक, अमलाचौरको धुरी, नारायणस्थान हुँदै कुश्मा पर्वत पुगेर ज्यान सुरक्षित भएको महशुस गरिएको थियो।’
बाग्लुङ निर्वाचन क्षेत्र नम्बर १ ख का नेपाली कांग्रेसको उम्मेदवार डिल्लीराम सुवेदीले जनमोर्चाका कार्यकर्ताले दिएको यातनाका कारणले हिजो घाउहरु अझै दुखेको स्वीकार गरेका छन् । उनले जनमोर्चाका कार्यकर्ताको कुटाईका कारण अझै पनि घाउहरु दुखेको साँचो भएको बताए । धौलागिरी टेलिभिजनको लागि दिएको एक अन्तरवार्तामा टाउमा लगाएका टाँकाहरु अहिलेको चिसो मौसममा दुखिरहेको बताए । उनले ती घाउहरुको कारणले केही अप्ठ्याराहरु रहेको बताउँदै गत स्थानीय निर्वाचनपछि जनतामा एकता, माया र सदभावको वातावरण बनेको दावी गरे ।
यसैगरी बाग्लुङ क्षेत्र नम्बर १ का नेकपा एमालेका उम्मेदवार डा सूर्यप्रसाद पाठकले जनमोर्चा नेपालका अध्यक्ष चित्रबहादुर केसीले गत निर्वाचनहरुमा धाँधली गरेर मात्र निर्वाचनमा सफलता प्राप्त गरेको दावी गरेका छन् । डा पाठकले चित्रबहादुर केसीले जितेका कुनै पनि निर्वाचन निश्पक्ष र धाँधली रहित नभएको अभिव्यक्ति सार्वजनिक रुपमै दिएका छन् । २०५४ र २०६४ सालको आम निर्वाचनमा जनमोर्चा कार्यकर्ताहरुले जिल्लाका केही मतदानस्थललाई आफ्नो कब्जामा लिएर एकलौटी मत खसालेको अनुभव पाठकले सुनाए ।
बागलुङ १ मा आगामी मंसिर ४ गते हुने निर्वाचनमा सत्ता गठबन्धनको समर्थनमा चित्रबहादुर केसी उम्मेदवार छन् भने एमालेका सूर्य पाठकले केसीलाई टक्कर दिएका छन् ।
आजको राजधानी दैनिकमा खबर रहेको छ ।
