बागलुङ, १८ चैत । नेपाल पत्रकार महासंघले आयोजना गरेको मिडिया मेला सफल बनाउन विद्यालय तहका विद्यार्थीलाई भित्तेपत्रिका तालिम दिइएको छ ।
सदरमुकामका विद्यालयका विद्यार्थीलाई तालिम दिइ मेलामा उनीहरुकै उत्पादनलाई प्रतिस्पर्धा गराइने भएको महासंघका अध्यक्ष राम थापा ‘अबिरल’ले बताउनुभयो । मंगलबार भएको तालिममा १४ विद्यालयका ४७ जना जना विद्यार्थी सहभागी भएका थिए ।
तालिममा सिकेको सीपमार्फत विद्यार्थीले बनाएका भित्तेपत्रिकालाई मेलामा प्रदर्शनी गरिने भएको भित्तेपत्रिका लेखन–मिडिया मेलाका संयोजक सिर्जना पन्तले जानकारी दिनुभयो । विद्यार्थीले निर्माण गरेका भित्तेपत्रिकालाई मेलामै निर्णयकर्ता तोकर विद्यार्थीहरुलाई पुरस्कार दिइने पन्तले जानकारी दिनुभयो ।
मेलाका लागि महासंघले अन्तिम तयारी गरिसकेको छ । मेलामा बागलुङको पत्रकारिता, गिद्देप्रेसदेखि डिजिटल युग, बागलुङको विकासमा कृषि, पर्यटन लगायतको क्षेत्रको आवश्यकता र योगदान बारेमा पनि छलफल हुनेछ । त्यस बाहेक पछिल्लो समय पत्रकारिताप्रति बढेको अविश्वास कम गरी पत्रकारितालाई व्यवसायिक बनाउन पहल गरिने समेत उद्देश्यमा उल्लेख छ । मेलामा पुराना पत्रकारिताका साधनको प्रर्दशनी, चित्रकला लगायतको कार्यक्रम समेत राखिएको छ ।
मेलालाई प्रचार गर्ने लक्ष्यले महासंघको स्थापना दिवसको दिन सोमबार पनि अन्तरक्रिया गरेको थियो । मेलालाई ऐतिहासिक बनाउन जिल्लाका सबै स्थानीय तह, सरकारी तथा गैरसरकारी क्षेत्रले सहकार्यको तयारी गरेका छन् ।
