सुजन रेग्मी
बागलुङ, ३ चैत । बागलुङमा श्रीमद भागवत महापुराण एवम् पितृ सप्ताह आयोजना गरिने भएको छ ।
सामुदायिक सेवा केन्द्र बागलुङ नगरपालिका वडा नं. ३ गुठीले ज्येष्ठ नागरिक दिवा सेवा र असक्त, असहाय बालबालिकाहरुको लागि दिवा सेवा कार्यक्रम सञ्चालन गर्नका लागि श्रीमद् भागवत महापुराण एवम् पितृ सप्ताह गरिने भएको सामुदायिक सेवा केन्द्र बागलुङ नगरपालिका वडा नं. ३ गुठीकी अध्यक्ष लिलादेवी खड्काले जानकारी दिनुभयो ।
ज्येष्ठ दिवा सेवा सञ्चालन, पितृ उद्धार, असहाय बालवालिका, अपाङ्गता र अशक्तहरुको कल्याण गर्ने उद्देश्यले सामुदायिक सेवा केन्द्र एवम् सामुदायिक प्रहरी सेवा केन्द्रको आयोजनामा बागलुङ नगरपालिका ३ स्थित चिप्लेटी बसपार्कमा श्रीमद् भागवत महापुराण पितृ सप्ताह गरिने भएको हो ।
प्रमुख बाचकको रुपमा पण्डित तिर्थराज उपाध्याय कृष्ण रहनुहुने उक्त श्रीमद् भागवत महापुराण पितृ सप्ताहमा साताभर विभिन्न कार्यक्रम हुने भएकाले सहभागी भई पुण्यलाभ लिन सामुदायिक सेवा केन्द्रका अध्यक्ष खड्काले बताउँनुभयो ।
चैत २० गते पुर्वाङ्ग, २१ गते ११ बजे भजनकिर्तनका साथ शोभायात्रा, उद्घाटन, पाठ परायण तथा कथा प्रवचन, २२ र २३ गते नियमित पुजापाठ, कथा प्रवचन, भजनकिर्तन, धुपबत्ती सङ्कलन, २४ गते कालीगण्डकीको किनारमा दिनको २ बजे पितृ उद्धारका लागि दीप प्रज्वलन, २५ र २६ गते नियमित पुजापाठ, कथा प्रवचन, भजनकिर्तन हुने भएको हो ।
यसैगरी २७ गते दीप प्रज्वलन सहित भजनकिर्तन, दाता सम्मान एवम् समापन गरिने अध्यक्ष खड्काले जानकारी दिनुभयो ।
प्रारम्भदेखि अन्त्यसम्मका सबै दिनमा दाताहरु सम्मान, प्रत्यक दिन मध्यान्हमा आगन्तुक भक्तसहित दिव्य आरती, बिज्ञहरुद्धारा दैनिक मनोपरामर्श कक्षा, दैनिक स्वास्थ्य परीक्षण र ओशो अमृतम ध्यान केन्द्रद्वारा खुसीको जीवन कार्यक्रम पनि सञ्चालन हुने उहाँले बताउनुभयो ।
केन्द्रका संस्थापक अध्यक्ष सहदेव राजभण्डारीले श्रीमद् भागवत महापुराण पितृ सप्ताह मार्फत १ करोड संकलन गर्ने लक्ष्य लिएको र १२ लाख खर्च हुने अनुमान गरिएको पनि बताउँनुभयो ।
गुठीस्थित चिप्लेटी बसपार्कमा चैत २१ गतेदेखि २७ गतेसम्म श्रीमद् भागवत महापुराण पितृ सप्ताह हुनेछ ।
