बागलुङ, १४ साउन । नेपाल बाल संगठनको प्रथम अधिवेशनबाट तारा शर्मा सभापतिमा चयन भएका छन् ।
मंगलबार भएको अधिवेशनबाट शर्मा नेतृत्वमा ७ सदस्य सर्वसम्मत चयन भएका हुन् । त्यस्तै संगठनको उपाध्यक्षमा रेणु केसी हमाल, उपसभापतिमा चुडामणी उपाध्याय र सचिवमा योगेश अधिकारी चयन भएका छन् ।
सदस्यहरुमा भोजराज पौडेल, विष्णु वि.क., सृष्टी क्षेत्री र करमती पुन मगर चयन भएका छन् । भेलाले सबै सदस्य चयन गरेकोमा तत्कालै बसेको बैठकले पदाधिकारी पनि चयन गरेको हो । निर्वाचन अधिकृत अधिवक्ता राम शर्माले ८ सदस्य रहेको समिति घोषणा गर्नुभएको हो । मंगलबारै भएको समितिको बैठकले पदाधिकारी पनि चयन गरेको सभापति तारा शर्माले जानकारी दिए । यसअघि शर्माकै अध्यक्षतामा तदर्थ समिति बनेको थियो । समितिलाई अधिवेसन गराउने अधिकार दिएपछि मंगलबार जिल्ला भेला भएको हो ।
भेलाको उद्घाटन गर्दै नेपाल बाल संगठन केन्द्रीय समितिकी अध्यक्ष विद्या उपाध्याय न्यौपानेले बालबालिकाले अधिकार प्राप्त गर्न सबै एक हुन आवश्यक रहेको बताए । बालबालिकाको अवस्था दयनीय रहेकोले उनीहरुको हितमा निश्वार्थ काम गर्ने संस्थाको रुपमा बाल संगठनलाई विकास गर्नुपर्ने कुरामा न्यौपानेले जोड दिइका थिए । बालबालिकालाई सुरक्षा गर्ने, उद्दार गर्ने काममा राज्यको दायित्व हुनुपर्नेमा अहिले सामाजिक संस्थाले गरिरहेको छ । राज्यलाई उत्तरदायी बनाउने काममा पनि संगठनले भूमिका खेल्ने उनको भनाई रहेको थियो ।
२०१८ सालमा नेपाल बाल संगठन स्थापना भएको थियो । संगठनले स्थापना कालदेखि नै हरेक जिल्लामा बाल मन्दिर सञ्चालन गर्ने, बालबालिकाको हितमा काम गर्ने, सडक र अन्य श्रमिक वा जोखिम क्षेत्रका बालबालिकाको उद्दार गरी पढाउने काममा पनि लाग्दै आएको हो ।
कार्यक्रममा बागलुङ नगरपालिका वडा नं. २ का अध्यक्ष सुरज बोसेल, भीमापोखरा युवा क्लबका अध्यक्ष तोया गौतम, धौलागिरि बहुमुखी क्याम्पस स्ववियू अध्यक्ष आस्मिन शेख, नेपाल पत्रकार महासंघ, बागलुङकी उपाध्यक्ष सिर्जना पन्त समेतले शुभकामना मन्तव्य राखेका थिए ।
कार्यक्रम तारा गौतमको अध्यक्षता, विज्ञान शर्माको स्वागत र चुडामणी उपाध्यायको सञ्चालन सम्पन्न भएको थियो ।
