बागलुङ, १५ जेठ । बागलुङमा तीन दिने प्रविधिमैत्री पत्रकारिता तालिम आजबाट सुरु भएको छ ।
नेपाल पत्रकार महासंघ बागलुङ शाखाको आयोजना र बागलुङ नगरपालिकाको आर्थिक सहयोगमा जिल्लामा क्रियाशिल रहेका पत्रकारहरुको लागि तालिम आयोजना गरिएको हो ।
तालिमको उद्घाटन बागलुङ नगरपालिकाका नगर प्रमुख बसन्त कुमार श्रेष्ठले गरेका थिए । उनले आजको युग सूचना प्रविधिको युग भएकोले पत्रकारहरु यो विषयमा अब्बल हुनुपर्ने कुरामा जोड दिएका थिए । सञ्चार क्षेत्रको बिकास तिव्र गतिमा भइरहेको हुनाले पत्रकारहरुले पनि आफूलाई समयसापेक्ष रुपमा बिकास गर्दै लैजानुपछै । पत्रकारहरुको क्षमता बिकास भएमा मात्र उनीहरुको जीवनस्तरमा पनि ठूलो परिवर्तन आउने श्रेष्ठको भनाई रहेको थियो ।
कार्यक्रममा बोल्दै नेपाल पत्रकार महासंघ बागलुङ शाखाका पूर्व अध्यक्ष तथा सल्लाहकार मुकेशचन्द्र राजभण्डारीले अनलाइन मिडिया सञ्चालन गर्ने सञ्चालक र पत्रकारहरुले सूचना प्रविधिको विषयमा जानकार भएमा मात्र धेरै समस्या भोग्नु नपर्ने बताएका थिए । यस्ता किसिमका तालिमहरुले पत्रकारहरु ठगिनबाट जोगिने उनको भनाई रहेको थियो ।
कार्यक्रम नेपाल पत्रकार महासंघ बागलुङ शाखाका अध्यक्ष नरेश कँडेलको अध्यक्षता, सहसचिव तारानाथ आचार्यको स्वागत र सचिव विजय रानाको सञ्चालनमा सम्पन्न भएको थियो ।
३२ जनाको सहभागिता रहेको तालिम १७ गतेसम्म सञ्चालन हुनेछ ।
