बागलुङ, २२ बैशाख । धौलागिरि अञ्चल अस्पताल बागलुङले बरेङ, जैमिनी र काठेखोलामा निशुल्क स्वास्थ्य शिविर सञ्चालन गर्ने भएको छ ।
महिलाको पाठेघर खस्ने समस्यालाई समाधानका लागि धौलागिरि अञ्चल अस्पताल बागलुङले निशुल्क रुपमा स्वास्थ्य शिविर सञ्चालन गर्न लागेको हो ।
आज भएको पत्रकार सम्मेलनमा स्त्रीरोग बिशेषज्ञ डा. रेखा शर्माले अस्पतातले बैशाख ३० गते बरेङ, जेठ ५ गते जैमिनी र जेठ १२ गते काठेखोलामा स्क्रिनिङ शिविर संचालन गर्न लागेकोे जानकारी गराएकी थिइन् । उनले पहिलो चरणमा स्क्रिनिङ शिविर सञ्चालन गर्ने र त्यसपछि शिविरको आधारमा पहिचान भएका बिरामीलाई उपचार र निशुल्क अपरेशन समेत गराउने योजना बनाएको छ ।
शिविरमा पाटेघर खस्ने समस्याका साथसाथै फिस्टुला, निसन्तान दम्पत्तिको समस्या समाधान, महिनावारी गडबडी, पिसाबको समस्या तथा प्रजनन स्वास्थ्यबारे पनि परीक्षण गरिनेछ । त्यस बाहेक पाठेघरको मुखको क्यान्सर परीक्षण, स्तन क्यान्सर हुन सक्ने सम्भावनाको खोजी पनि गरिने शर्माको भनाई रहेको छ ।
सरकारी अस्पतालमा पाठेघरको अपरेशन निशुल्क रुपमा हुनेछ । निजी संस्थामा गएमा भने डेढ लाख सम्मको रुपैयाँसम्म खर्च हुन् सक्नेछ । सरकारले पठाइदिने प्रतिव्यक्ति १३ हजार र अस्पताल विकास समितिले थप गर्ने ६ हजार गरी १९ हजारको उपकरण र औषधी प्रयोगपछि अपरेशन गर्न सकिने गरी यो अवसर ल्याइएको अस्पताल विकास समितिका अध्यक्ष नारायण शर्मा पौडेलले बताए ।
अस्पतालले बिरामीको अवस्था पहिचान गरी अपरेशनको समय भने पछि तय गर्नेछ । गत वर्ष पनि विभिन्न स्थानमा भएका स्क्रिनिङबाट ३६ जनाको अपरेशन निशुल्क रुपमा गरिएको थियो । यो वर्ष पनि बिरामीको पहिचान भएमा निशुल्क रुपमा अपरेशन गर्ने पौडेलले जनाएका छन् ।
कार्यक्रम अस्पतालका मेडिकल सुपरिटेण्डेन्ट डा. रविरन्जन प्रधानको स्वागत तथा नवराज शर्माको सञ्चालनमा सम्पन्न भएको थियो ।
