बागलुङ, ९ बैशाख । बागलुङ नगरपालिकाले शैक्षिक गुणस्तर अभिवृद्धि गर्ने उद्देश्यले नगरभित्रका ३३ वटा विद्यालयको तह मिलान गरेको छ ।
बागलुङ नगरपालिकाको तेह्रौ नगरसभाबाट भएको निर्णय बमोजिम तथा नगर शिक्षा समितिको सुझाव र विद्यालयको स्थलगत अनुगमन समितिको सिफारिस प्रतिवेदनको आधारमा विद्यालय स्थगत र तह मिलान गरिएको नगरप्रमुख वसन्त कुमार श्रेष्ठले बताए ।
उनले शुक्रबार पत्रकार सम्मेलनमा बोल्दै शिक्षा अनुगमन समितिले नगरपालिका भित्रका ४८ वटा विद्यालयहरु अध्ययन गरेको र आवश्यक तथा समस्याहरुको पहिचान गरी ३३ वटा विद्यालयहरुको स्थगन र तह मिलान गरिएको बताए ।
नगरपालिकाले कक्षा १ सम्म अध्यापन हुने बानपा–९ को सरस्वती सामुदायिक र रानीभूमे प्रा.विमा पठनपाठन स्थगन गरेको छ ।
तह मिलनपछि अब बालविकास केन्द्र संचालन हुने विद्यालयको संख्या ८, बालविकास केन्द्र र कक्षा एक मात्र संचालन हुने विद्यालयहरुको सङ्ख्ख्या ११, कक्षा एक मात्र संचालन हुने विद्यालय १, कक्षा एक देखि तीनसम्म संचालन हुने विद्यालय सङ्ख्या ५, कक्षा एकदेखि चारसम्म संचालन हुने विद्यालय दुई र चार विद्यालयमा कक्षा एकदेखि ६ कक्षासम्म संचालन हुने र विद्यालय स्थगन र तह मिलानपछि शिक्षकहरुलाई सोही वडाभित्रका आवश्यक रहेका विद्यालयमा दरबन्दी मिलान गरी व्यवस्थापन गरिने छ ।
नजिकमा विद्यालय नभएको, अलग्गै बस्ती र भौगोलिक विकटता भएको विद्यालय तथा कक्षा स्थगनले पढाईबाट बञ्चित हुने बालबालिकालाई आवश्यक व्यवस्था गरिने श्रेष्ठको भनाईछ । स्थगन भएका विद्यालयमा प्राप्त विद्यार्थीहरु उपलब्ध भए पुनः विद्यालय संचालन गर्न सकिने समेत बताइएको छ ।
स्थगन भई खाली हुने विद्यालयलाई वडा कार्यालयको संरक्षकत्वमा विद्यालय छात्रावास, पुस्तकालय, सामुदायिक सिकाई तथा प्रशिक्षण केन्द्र, सामुदायिक प्रयोजनका भवन, टोल सुधार, महिला समूहको भवनको रुपमा प्रयोगमा ल्याइने नगरप्रमुख श्रेष्ठको भनाई छ ।
शिक्षा अनुगमन समितिले तय गरेको मापदण्ड बमोजिम विद्यालय स्थगन भई विद्यार्थीहरु जाने विद्यालयको लागि बढीमा २ लाख ब्यवस्थापनको लागि र प्रत्येक तह मिलान हुने विद्यालयहरुलाई प्रतिकक्षा २५ हजारको दरले उपलब्ध गराउने र नेपाल सरकारले दिएको रु १५ रुपैयाँ दिवा खाजामा नगरपालिकाले रु ५ रुपैयाँका दरले थप गरि रु २० रुपैयाँ दिने बताइएको छ ।
नगरपालिकाले अब नगरभित्रका प्राथमिक तहका शिक्षक नियुक्तिमा खुल्ला प्रतिस्पर्धाबाट नियुक्ति गराउने अवधारणा पनि ल्याइएको प्रमुख श्रेष्ठले बताए ।
