बागलुङ, ३० जेठ । बागलुङमा सार्वजनिक यातायातको भाडादर निर्धारण गरिएको छ । मंगलबार बसेको जिल्ला प्रशासन कार्यालय बागलुङ, यातायात व्यवस्था कार्यालय बागलुङ, पूर्वाधार विकास कार्यालय बागलुङ, जिल्ला ट्राफिक प्रहरी कार्यालय बागलुङ र यातायात व्यवसायीहरुको संयुक्त बैठकले जिल्लाभर गुड्ने साना तथा ठूला यात्रुबहाक सवारीको भाडादर निर्धारण गरेको हो ।
अब बागलुङ बजारदेखि बुर्तिबाङ सम्म बस यात्रा गर्दा ८३० रुपैयाँ भाडा तिर्नुपर्नेछ भने जीपमा ९८० रुपैयाँ भाडा निर्धारण गरिएको छ । बागलुङ बजारदेखि जुग्जाखोलासम्म बसमा ९८० रुपैयाँ र जीपमा ११६० रुपैयाँ, बागलुङ बजारदेखि अक्षेतेसम्म बसमा ७५ रुपैयाँ र जीपमा १०० रुपैयाँ भाडा तिर्नुपर्नेछ ।
बागलुङ बजारदेखि सुल्डाँडासम्म बसमा ९० रुपैयाँ र जीपमा १३० रुपैयाँ, घोडाबाँधेसम्म बसमा २५५ रुपैयाँ र जीपमा ३५० रुपैयाँ, नरेठाँटीसम्म बसमा ४१० रुपैयाँ र जीपमा ५२० रुपैयाँ, गलकोटको हटिया बजारसम्म बसमा ४५० र जीपमा ५७० रुपैयाँ भाडादर निर्धारण गरिएको छ । यस्तै गलकोट हटिया बजारदेखि ताराखोलासम्म जीपमा ४ सय रुपैयाँ र बुर्तिबाङदेखि बोंगादोभानसम्म जीपमा २ सय रुपैयाँ भाडा निर्धारण गरिएको छ ।
संयुक्त बैठकले बागलुङ बजारदेखि हरिचौरसम्म बसमा ४५० रुपैयाँ र जीपमा ७ सय रुपैयाँ, काँडेबाससम्म बसमा ५ सय रुपैयाँ र जीपमा ६५० रुपैयाँ, मनेवापाटा रिघासम्म बसमा ५८५ रुपैयाँ र जीपमा ७ सय रुपैयाँ, खरबाङसम्म बसमा ६३५ रुपैयाँ र जीपमा ७३० रुपैयाँ, बडिगाड ग्वालीचौरसम्म बसमा ६५० रुपैयाँ र जीपमा ८ सय रुपैयाँ, भीमगिठेसम्म बसमा ६९० रुपैयाँ र जीपमा ८४० रुपैयाँ भाडा निर्धारण गरिएको छ ।
यस्तै बागलुङ बजारदेखि कुश्मीसेरा हुँदै हुग्दिशिरसम्म बसमा ५५० रुपैयाँ र जीपमा ९७० रुपैयाँ भाडा निर्धारण गरिएको छभने सिगाना हुँदै हुग्दिशिरसम्मको लागि भने बसमा जीपमा ७७० रुपैयाँ भाडा निर्धारण गरिएको प्रमुख जिल्ला अधिकारी रोशनी कुमारी श्रेष्ठले बताइन । बागलुङ बजारदेखि कुश्मीसेरासम्म बसमा २३० रुपैयाँ र जीपमा २६० रुपैयाँ, अर्गलसम्म जीपमा ९ सय रुपैयाँ, बागलुङ बजारदेखि म्याग्दीको रत्नेचौरसम्म बसमा ६० रुपैयाँ र जीपमा ८५ रुपैयाँ र रत्नेचौर हुँदै म्याग्दीको बेनी बजारसम्म बसमा १ सय रुपैयाँ र जीपमा १२० रुपैयाँ नयाँ भाडादर कायम गरिएको छ ।
सार्वजनिक सवारीहरुले गन्तव्य स्थानसम्मको दुरी (कि.मि.मा) र भाडादर यात्रुहरुले देख्ने गरी पारदर्शी तबरले टाँस गर्नुपर्ने र नयाँ भाडादर यातायात व्यावसायीहरु मार्फत कार्यान्वयन गर्ने गराउर्ने निर्णय भएको यातायात व्यवस्था कार्यालय बागलुङका प्रमुख पारसिङ्ग थापाले बताए । उनले स्थानीय तह भित्रका सडकहरुको सम्बन्धमा सम्बन्धित स्थानीय तहले भाडादर तोकी कार्यान्वयनमा ल्याउने निर्णय भएको बताए ।
