भक्तपुर, २० जेठ । गुडिरहेको गाडीबाट खसेर भक्तपुरमा एक महिलाको मृत्यु भएको छ ।
भक्तपुर नगरपालिका १ सल्लाघारी हनुमन्ते पुलस्थित राधेराधेबाट निकोसेरातर्फ जाँदै गरेको बा.२१.च ५३०१ नम्बरको गाडीमा सवार एक महिलाको खसेर मृत्यु भएको जिल्ला प्रहरी परिसर भक्तपुरका प्रहरी उपरीक्षक प्रजिअ केसीले जानकारी दिए ।
करिब ४३ वर्षीया मृतक महिलाको पहिचान हुन नसकेको र पहिचानको प्रयास भइरहेको उनले बताए ।
गाडीबाट खसेर घाइते भएकी महिलाको उपचारका क्रममा मृत्यु भएको हो ।
गाडी चालक काभ्रे भुम्लु गाउँपालिका ३ घर भई हाल ललितपुर इमाडोल बस्ने ३० वर्षीय सूर्यबहादुरलाई प्रहरीले नियन्त्रणमा लिएको छ । चालक सूर्यबहादुरलाई प्रहरी वृत्त जगातीमा राखेर घटनाबारे थप अनुसन्धान भइरहेको प्रहरी उपरीक्षक केसीले बताए ।
