गुलरिया, ६ चैत । बर्दियामा बाघको आक्रमणबाट दुई जना महिलाको मृत्यु भएको छ। मधुवन नगरपालिका ५ स्थित चिरौटे सामुदायिक वनमा दाउरा खोज्न गएका दुवैको शव भेटिएको हो।
बाघको आक्रमणबाट मधुवन नगरपालिका ५ की ५५ वर्षीया समुन्द्री बुढाक्षेत्री र ५० वर्षीया धनसरी गुरुङ मृत्यु भएको डिभिजनल वन कार्यालय बर्दियाका अधिकृत एवम् सूचना अधिकारी द्रोणराज शर्माले पुष्टि गरे।
दुवै शव पोष्ट मार्टमका लागि बर्दिया अस्पताल पठाएका छौं, उनले भने, दिउँसोको समयमा जंगल पुगेका उनीहरू धेरैबेरसम्म घर नफर्किएपछि खोजी गर्ने क्रममा शव भेटिएको हो। घटनास्थल वरपर बाघको खोजी गर्दैछौं।
भारतको कर्तनियाघाट वन्यजन्तु आरक्ष र बर्दिया राष्ट्रिय निकुञ्ज जोड्ने जैविक मार्गमा अवस्थित सामुदायिक वनमा घटना भएको हो। सो क्षेत्रमा पटक पटक बाघले आक्रमण गर्दै आएको खाता सामुदायिक वन समन्वय समितिका अध्यक्ष हरि गुरुङले बताए।
निकुञ्ज, वन कार्यालय, एनटीएनसी लगायत सामुदायिक वनहरूको सहकार्यमा बाघ अनुगमनका लागि अटोमेटिक क्यामेरा पनि जडान भएको छ।
