वेलिङ्टन : भारतले न्युजिल्यान्डविरुद्धको टी-ट्वेन्टी अन्तर्राष्ट्रियको पहिलो खेलमा घरेलु टिमलाई ६५ रनले पराजित गरेको छ। बे ओभल क्रिकेट मैदानमा टस हारेर ब्याटिङ थालेको भारतले ६ विकेटको क्षतिमा एक सय ९१ रनको योगफल तयार गरेको थियो।
दोस्रो इनिङमा एक सय ९२ रनको लक्ष्य पछ्याएको न्युजिल्यान्डलाई १८.५ ओभरमा एक सय २६ रनमा अलआउट गर्दै भारतले पहिलो जित निकाल्यो। भारतका लागि सूर्यकुमारले ५१ बलमा ११ चौका र सात छक्कासहित एक सय ११ रनको शानदार शतकीय इनिङ खेले। यस्तै ओपनर इशान किशन ३१ बलमा ३६ रन बनाएर पेभेलियन फर्केका थिए। अन्य ब्याटरले उल्लेख्य प्रदर्शन गर्न सकेनन्।
न्युजिल्यान्डका लागि टिम साउथीले सर्वाधिक तीन तथा ल्युक फर्ग्युसनले दुई र इश सोधीले एक विकेट लिए। न्युजिल्यान्डका लागि कप्तान केन विलियमसनले ५२ बलमा चार चौका र दुई छक्कासहित ६१ रनको अर्धशतकीय इनिङ खेले। डेभोन कोनवेले २५ बाहेक अन्य ब्याटरले उल्लेख्य प्रदर्शन गर्न नसक्दा न्युजिल्यान्डले घरेलु मैदानमा हार टार्न सकेन।
बलिङतर्फ भारतका लागि दीपक हुडाले सर्वाधिक चार तथा युजभेन्द्र चहल र मोहम्मद सिराजले दुई-दुई विकेट लिँदा भुवनेश्वक कुमारको नाममा एक विकेट रह्यो। पहिलो खेल वर्षाका कारण रद्द भएको थियो। अर्को निर्णायक खेल शुक्रबार अक्ल्यान्डमा हुनेछ।
