बागलुङ, २० असोज । बागलुङमा चाडपर्वलाई लक्षित गरि यात्रु सहायता कक्ष स्थापना गरिएको छ ।
बागलुङका चारवटा ठाउँमा यात्रु सहायता कक्ष स्थापना गरिएको जिल्ला प्रहरी कार्यालय बागलुङका प्रमुख प्रहरी उपरीक्षक फडिन्द्र प्रसाइले जानकारी दिनुभयो । यात्रुलाई सहजरुपमा यात्रा गर्न सकुन भन्ने उद्देश्यले स्थापना गरिएको प्रसाइले बताउनुभयो ।
चाडपर्वको बेलामा यात्रुले विभिन्न सास्ती पाउन सक्ने भन्दै बागलुङ नगरपालिका १ मालढुंगा, बागलुङ नगरपालिका २ समिट चोक, गलकोट नगरपालिका ३ हटियाबजार, ढोरपाटन नगरपालिका १ बुर्तिबाङ बजारमा यात्रु सहायता कक्ष स्थापना गरिएको हो ।
चाडपर्वको समयमा भाडाका कारण यात्रु ठगिने, यात्रुको सामान हराउने, सवारीमा क्षमताभन्दा बढी यात्रु राख्दा दुर्घटनाको जोखिम हुनेलगायतका समस्या कम गराउनका लागी सहायता कक्ष स्थापना गरिएको प्रमुख जिल्ला अधिकारी कृष्ण प्रसाद आचार्यले जानकारी दिनुभयो ।
यसलाई थप प्रभावकारी बनाउनका लागि नियमित अनुगमन गरिने प्रजिअ आचार्यले बताउनुभयो ।
