बागलुङ, १७ असोज । बागलुङमा खानेपानी मर्मतमा नेपालीसेना सहितको सुरक्षा निकायले सक्रियता देखाएको ।
बागलुङ बजारमा आपूर्ति हुँदै आएको खानेपानीको पाइप जोखिमपूर्ण स्थानमा क्षति पुगेपछि नेपाली सेनाको सहयोगमा मर्मत तथा जडान गरिएको छ।
असोज ८ गतेदेखि ११ गतेसम्म परेको अविरल वर्षाका कारण बागलुङ नगरपालिका–९ स्थित रिठेखोलाबाट आएको खानेपानीको पाइप काठेखोलामा क्षति पुगेको थियो। जोखिमपूर्ण स्थानमा रहेको उक्त पाइप नेपाली सेनाको कालिजंग गण, घोडाबाँधेको टोलीले दुई दिन लगाएर मर्मत तथा जडान गरेको हो।
उक्त पाइपबाट प्रतिसेकेन्ड चार लिटर पानी आपूर्ति भइरहेको कालिजंग गण, घोडाबाँधे ब्यारेकका गणपति प्रमुख सेनानी शिवबहादुर अधिकारीले बताउनुभयो। काठेखोलामाथिको जोखिमपूर्ण स्थानमा सेनाको सहयोगमा पाइप जडान गरिएको उहाँले जानकारी दिनुभयो।
वर्षाका कारण आएको बाढी, पहिरो तथा भू–क्षयले खानेपानी आपूर्ति गर्ने पाइप तथा संरचनामा क्षति पुगेपछि बागलुङ बजारमा खानेपानीको नियमित आपूर्ति अवरुद्ध भएको थियो। नगर खानेपानी तथा उपभोक्ता संस्थाको जनशक्ति पर्याप्त नभएपछि नेपाली सेना, सशस्त्र प्रहरी, नेपाल प्रहरी तथा बागलुङ नगरपालिकाको नगर प्रहरीको सहयोगमा मर्मतको काम भइरहेको छ।
बागलुङ बजारमा दैनिक झण्डै ३५ लाख लिटर पानी खपत हुने गरेकोमा शुक्रबारदेखि करिब २० लाख लिटर पानी आपूर्ति हुन थालेपछि खानेपानीको समस्या आंशिक रूपमा समाधान हुँदै गएको नगर खानेपानी तथा उपभोक्ता संस्थाका कार्यवाहक अध्यक्ष हरिबहादुर जिसी ‘सन्तोष’ले बताउनुभयो।
हाल तित्याङको रिठेखोला, कैलामपोखरीबाट लिफ्टमार्फत तथा रेशबाट बागलुङ बजारमा पानी आपूर्ति भइरहेको छ। भुँदी खोलाबाट पानी ल्याउने संरचनामा ठूलो पहिरो गएकोले त्यहाँबाट पानी आपूर्ति गर्न अझै केही समय लाग्ने जिसीले बताउनुभयो।
खानेपानीको समस्या भएपछि रातामाटा उपभोक्ता संस्था र पाखाथर उपभोक्ता संस्थाको ओभरफ्लो पानी नगर खानेपानीको ट्याङ्कीमा ल्याएर वितरण भइरहेको छ। सुल्डाडाको रिजर्भ ट्याङ्कीबाट बागलुङको मुख्य बजार, गुठी र रामरेखा क्षेत्रमा पानी वितरण भइरहेको छ भने रातामाटाको पुरानो ट्याङ्कीबाट श्रीनगरटोल, उपल्लाचौर र वडारचौर क्षेत्रमा पानी वितरण भइरहेको छ।
खानेपानीको अभावका कारण बजार क्षेत्रको जनजीवन कष्टकर बन्दै गएपछि तत्काल वैकल्पिक माध्यमबाट पानी उपलब्ध गराउन बागलुङ नगरपालिकाको दमकलमार्फत समेत पानी वितरण गरिएको थियो। पर्याप्त पानी उपलब्ध हुन नसकेपछि दमकलबाट पानी लिन स्थानीयवासीको भीड लाग्ने गरेको थियो।
