बागलुङ,१असोज । नेपाली कांग्रेसको १५औँ महाधिवेशनको माहोल केन्द्रबाट जिल्ला हुँदै वडा तहसम्म पुगेको छ ।
केन्द्रीय निर्वाचन समितिले असोज ३ र ४ गते देशभर गाउँ–नगर वडा अधिवेशन गर्ने कार्यतालिका सार्वजनिक गरेसँगै बागलुङ कांग्रेस पनि महाधिवेशनको संगारमा जुटेको हो । केन्द्रीय कार्यतालिकाअनुसार वडा अधिवेशनबाट वडा कार्यसमिति चयनसँगै क्षेत्रीय प्रतिनिधि छनोट हुनेछन् ।
त्यसपछि असोज ७ गते गाउँ–नगरपालिका अधिवेशन, असोज १० गते प्रदेशसभा तथा प्रतिनिधिसभा क्षेत्रीय अधिवेशन र असोज १६ देखि १९ गतेसम्म केन्द्रीय महाधिवेशन हुनेछ । बागलुङमा भने जिल्लाका ८५ वटै वडामा एकैपटक अधिवेशन सम्पन्न गर्ने गरी तयारी अघि बढाइएको छ ।त्यसका लागि नेपाली कांग्रेस बागलुङका कार्यवाहक सभापति तारानाथ पौडेलको अध्यक्षतामा जिल्ला स्तरीय बैठक बसेर वडा अधिवेशनलाई व्यवस्थित बनाउने निर्णय गरिएको छ ।
बैठकमा केन्द्रीय सदस्यहरू चम्पादेवी खड्का, जगदीशचन्द्र उपाध्याय, टेकराज पौडेल र भीम श्रीस, पूर्वसभापतिहरु हरिप्रसाद श्रेष्ठ र प्रकाश शर्मा पौडेल, प्रतिनिधिसभा सदस्य रेणुका काउचा मगर, प्रदेशसभा सदस्यहरू डिल्लीराम सुवेदी, द्रोणकुमार कुँवर र डिलमाया पौवी लगायत नेता सहभागी थिए । बागलुङका लागि खटिएका निर्वाचन अधिकृत शालिकराम भट्टराईसहित जिल्ला कार्यसमिति, महासमिति सदस्य, महाधिवेशन प्रतिनिधि, क्षेत्रीय तथा पालिका तहका पदाधिकारी र भ्रातृ तथा शुभेच्छुक संस्थाका प्रतिनिधिहरूको समेत सहभागितामा बैठक सम्पन्न् भएको सचिव हरिहर शर्माले जानकारी दिनुभयो ।
बैठकले वडा अधिवेशनका लागि आवश्यक निर्वाचन अधिकृत खटाउने निर्णयसमेत गरेको छ । वडाबाट सुरु हुने ‘महाधिवेशनको राजनीति’ कांग्रेसको महाधिवेशन काठमाडौंमा हुने केन्द्रीय नेतृत्वको निर्वाचन मात्र होइन । त्यसको वास्तविक सुरुआत भने वडा तहबाट हुन्छ ।
वडा अधिवेशनबाट चुनिने प्रतिनिधिहरू क्रमशः पालिका, प्रदेशसभा क्षेत्र, प्रतिनिधिसभा क्षेत्र हुँदै केन्द्रीय महाधिवेशनसम्म पुग्ने भएकाले असोज ३ र ४ गतेको वडा अधिवेशन कांग्रेसभित्रको नेतृत्व निर्माणको पहिलो महत्वपूर्ण खुड्किलो बन्नेछ । त्यसैले बागलुङका ८५ वडामा हुने अधिवेशनलाई सामान्य संगठनात्मक कार्यक्रमका रूपमा मात्र हेरिएको छैन । वडा सभापति र कार्यसमिति चयनसँगै आगामी तहका अधिवेशनमा जाने प्रतिनिधिको छनोटले जिल्लाको कांग्रेस राजनीतिमा पनि प्रभाव पार्नेछ ।
वडा तहमा सहमति बन्छ कि निर्वाचन हुन्छ, पुराना अनुहार दोहोरिन्छन् कि नयाँ पुस्ताले स्थान पाउँछ, स्थानीय गुट–समूहबीच समझदारी हुन्छ कि प्रतिस्पर्धा बढ्छ—यी विषयले आगामी अधिवेशनको वातावरण निर्धारण गर्नेछन् । यद्यपि यी विषयमा अहिले नै निष्कर्ष निकाल्नुभन्दा वडा अधिवेशनको प्रक्रिया र परिणाम हेर्नुपर्ने हुन्छ । केन्द्रीय तहमा पनि यसपटकको महाधिवेशनलाई लिएर व्यापक सहभागिता र सौहार्दपूर्ण वातावरणमा अधिवेशन सम्पन्न गर्ने अपिल गरिएको छ । पार्टी सभापति गगन थापाले समेत असोज ३ र ४ गते हुने वडा अधिवेशनमा कुनै अलमलमा नपरी सहभागी हुन क्रियाशील सदस्य, समर्थक र शुभेच्छुकलाई आह्वान गर्नु भएको छ । बागलुङमा अब चुनौती तयारी पूरा गर्नुमा मात्र छैन ।
८५ वटै वडामा क्रियाशील सदस्यको सहभागिता सुनिश्चित गर्ने, निर्वाचन प्रक्रियालाई पारदर्शी बनाउने, प्रतिस्पर्धालाई स्वस्थ राख्ने र अधिवेशनपछि पनि संगठनलाई एकताबद्ध राख्ने चुनौती उत्तिकै महत्वपूर्ण छ ।
कांग्रेसको १५औँ महाधिवेशनको घडी नजिकिँदै गर्दा बागलुङ कांग्रेसले पनि आफ्नो संगठनात्मक शक्ति परीक्षण गर्ने अवसर पाएको छ । केन्द्रको महाधिवेशनको बाटो अब बागलुङका ८५ वडा हुँदै अघि बढ्दैछ । अब कांग्रेसको महाधिवेशन काठमाडौंमा होइन, पहिले बागलुङका गाउँ–गाउँ र वडा–वडामा देखिनेछ ।
