बागलुङ, १४ भदौ । बागलुङबाट एकीकृत रूपमा जिन्सी राहत पठाइने भएको छ ।
गत भदौ १० गते भोटेकोशीमा आएको विनाशकारी बाढीबाट प्रभावित क्षेत्रका पीडितका लागि जिल्ला विपद् व्यवस्थापन समितिको शनिबार बसेको बैठकले राहत संकलन तथा वितरण समिति गठन गर्दै जिल्लाभरबाट खाद्यान्न, लत्ताकपडा तथा अन्य अत्यावश्यक राहत सामग्री संकलन गर्ने निर्णय गरेको हो। संकलित राहत सामग्री जिल्ला प्रशासन कार्यालयको समन्वयमा धादिङको बैरेनी पठाइनेछ।
सहायक प्रमुख जिल्ला अधिकारी नवराज बरालको संयोजनमा बसेको बैठकले बागलुङ उद्योग वाणिज्य संघका अध्यक्ष राजनकुमार शाक्यको संयोजकत्वमा १० सदस्यीय राहत संकलन तथा वितरण समिति गठन गरेको छ।
समितिका सदस्यमा यातायात व्यवसायीबाट उमेश केसी, नेपाल पत्रकार महासंघबाट खेमराज गौतम, गैरसरकारी संस्थाबाट शालिकराम शर्मा, बैंकर्सबाट श्रीजय श्रेष्ठ, औषधि व्यवसायीबाट खगेश्वर पौडेल, नेपाल रेडक्रसबाट राजेन्द्र आचार्य, होटल व्यवसायीबाट ललिता थापा, नेपाल प्रहरीबाट यमनारायण अर्याल तथा जिल्ला प्रशासन कार्यालयबाट खिमबहादुर विक रहेका छन्।
समितिका संयोजक राजनकुमार शाक्यका अनुसार दुई दिनभित्र एक ट्रक राहत सामग्री संकलन गरी पठाइनेछ। राहतमा ४०० बोरा चामल, १०० कार्टुन खाने तेल, दाल, सोयाबिन, दालमोट, भुटेको मकै लगायतका तयारी खाद्यान्न तथा आवश्यक लत्ताकपडा संकलन भइरहेको छ।
संकलित राहत सामग्री बागलुङ उद्योग वाणिज्य संघमा राखिने र जिल्ला प्रशासन कार्यालयको समन्वयमा धादिङको बैरेनीस्थित बाढी प्रभावित क्षेत्रमा पठाइने जनाइएको छ।
