बागलुङ, साउन १९। बागलुङमा रातिको समयमा खाना पकाउने ग्याँस बढी मूल्यमा बिक्री–वितरण गरिरहेको अवस्थामा प्रहरीले एक पिकअप भ्यान नियन्त्रणमा लिएको छ।
जिल्ला प्रहरी कार्यालय बागलुङका प्रहरी नायब उपरीक्षक (डीएसपी) रामेश्वर त्वातीका अनुसार साउन १८ गते राति करिब ८ः३० बजे बागलुङ नगरपालिका–१ रामरेखामा बागलुङ नगरपालिका–१३ निवासी ४३ वर्षीय भुपति जैसीले पिकअप भ्यानमार्फत गृहलक्ष्मी एलपी ग्यासका सिलिण्डर लुकाइछिपाई सर्वसाधारणलाई तोकिएको भन्दा बढी मूल्यमा बिक्री गरिरहेको अवस्थामा प्रहरीले नियन्त्रणमा लिएको हो।
प्रहरीका अनुसार पिकअप भ्यानमा रहेका ६० थान ग्यास सिलिण्डरमध्ये ४१ थान भरिएका र १९ थान बिक्री भइसकेका खाली सिलिण्डर फेला परेका छन्। ग्यास सिलिण्डरसहित पिकअप भ्यान नियन्त्रणमा लिइएको प्रहरीले जनाएको छ।
घटनामा संलग्न व्यक्ति र पिकअप भ्यानलाई नियन्त्रणमा लिई जिल्ला प्रशासन कार्यालय बागलुङबाट कालोबजारीसम्बन्धी कसुरमा सात दिनको म्याद थप अनुमति लिएर आवश्यक अनुसन्धान भइरहेको डीएसपी त्वातीले जानकारी दिनुभयो।
