बागलुङ, २६ असार । बागलुङबाट प्रकाशित परिसूचन साप्ताहिक पत्रिकाले शुक्रबार आफ्नो १३औँ वार्षिकोत्सवको अवसरमा पत्रकारहरुबिच मैत्रीपूर्ण फुटसल प्रतियोगिता आयोजना गरिएको थियो ।
प्रतियोगितामा आयोजक टोली, नेपाल पत्रकार महासङ्घ बागलुङ शाखा र प्रबुद्ध युवा समूहको सहभागिता रहेको थियो । प्रतिस्पर्धामा प्रबुद्ध युवा समूह विजेता बन्दा नेपाल पत्रकार महासङ्घ उपविजेतामा सीमित रह्यो भने आयोजक टोलीले तृतीय स्थानमा चित्त बुझायो।
विजेता प्रबुद्ध युवा समूहलाई नगदसहित ट्रफी र प्रमाणपत्र प्रदान गरिएको थियो। उपविजेता नेपाल पत्रकार महासङ्घ र तृतीय हुने आयोजक टोलीलाई प्रमाणपत्र प्रदान गरिएको थियो। प्रतियोगिताको उद्घाटन गर्दै जिल्ला समन्वय समिति बागलुङका प्रमुख अमर थापाले खेलकुदले मानिसलाई शारीरिक तथा मानसिक रूपमा स्वस्थ राख्न महत्वपूर्ण भूमिका खेल्ने बताउनुभयो।
कार्यक्रममा नेपाल पत्रकार महासङ्घ बागलुङका उपाध्यक्ष सुवास आचार्यले शुभकामना मन्तव्य व्यक्त गर्नुभएको थियो । लेखन नेपाल मिडिया प्रालिद्वारा प्रकाशित पत्रिकाले विगतका वर्षहरूमा फुटबल, फुटसल प्रतियोगिता तथा विभिन्न क्षेत्रमा शैक्षिक सामग्री र खाद्यान्न वितरण लगायतका कार्यक्रम गर्दै आएकोमा यस वर्ष वार्षिकोत्सवको अवसरमा मैत्रीपूर्ण फुटसल प्रतियोगिता आयोजना गरेको हो।
लेखन नेपाल मिडिया प्रालिका अध्यक्ष विजय रानाको अध्यक्षतामा सम्पन्न कार्यक्रममा प्रबन्धक नवराज नेपालीले स्वागत मन्तव्य राख्नुभएको थियो भने सञ्चालन पत्रिकाका सम्पादक ताराप्रसाद शर्माले गर्नुभएको थियो।
