बागलुङ , ७ जेठ । गण्डकी प्रदेशका मुख्यमन्त्री सुरेन्द्रराज पाण्डेले अस्पतालले बिरामीको गुनासो नआउनेगरी सेवा दिन आग्रह गर्नुभएको छ ।
हिजो धौलागिरि प्रादेशिक अस्पताल र धौलागिरि आयुर्वेद अस्पतालको स्थलगत निरिक्षण पछि अस्पताल व्यवस्थापन र चिकित्सकलाई गुनासो नआउनेगरी सेवा प्रवाह गर्न आग्रह गर्नुभएको छ ।
सेवा प्रवाह राम्रो भएको पाएको भएपनि कहिलेकाही अस्पतालमा औषधी नपाएको र डाक्टर नआएको जस्ता गुनासो आउने गरेकाले गुनासो नआउनेगरी काम गर्न स्वास्थ्यकर्मीलाई आग्रह गर्नुभएको छ ।
गण्डकी प्रदेश सरकारले धौलागिरि अस्पतालमा सिटिस्क्यानदेखि ठूला रोगको निदानमा करोडौ लगानी गरेको बताउदै नागरिकले जिल्लामै गुनासो रहित सेवा पाउनुपर्ने उहाँको जोड थियो ।
अस्पतालको बालरोग विभाग, आइसियु र डाइलाइसि सेवा नमूना र प्रदेशले गर्व गर्न लायक रहेको मुख्यमन्त्री पाण्डेले बताउनुभयो । १० करोड खर्चेर प्रदेशरले यस अस्पतालमा सिटि उपकरण खरिद गरेको सुनाउनुभयो ।
“प्रदेश सरकारले खरिद गरेको पहिलो सिटिस्क्यान उपकरण धौलागिरि अस्पतालमा आएपछि पोखरा जानुपर्ने अवस्था अन्त्य भएको रहेछ, अहिले सर्वसुलभ र निजीको भन्दा आदा कम रकममा सिटि हुँदो रहेछ” अनुमगनपछि मुख्यमन्त्री पाण्डेले भन्नुभयो “जनतालाई प्रदेश सरकारले गरेका स्वास्थ्य क्षेत्रको सुधारको विषयमा जानकारी दिएर सेवा प्रवाह अझै व्यापक बनाउनु पर्दछ, हरेक स्थानमा टोकन प्राणली लागु गर्न आवश्यक छ, अस्पताल प्रदेश मातहतमा आएपछि सेवा प्रवाहमा निकै सुधार आएको पाए ।”
पाण्डेलाई अस्पतालको भौतिक संरचना र सेवा प्रवाहको विषयमा धौलागिरि अस्पतालका अध्यक्ष श्रीप्रसाद शर्माले जानकारी गराउनुभएको थियो । शर्माले अस्पतालमा भौतिक संरचना थप गर्न र डाइलाइसिस सेवाका उपकरण थप गर्न मुख्यमन्त्री समक्ष माग गर्नुभएको थियो ।
यस्तै मुख्यमन्त्री पाण्डेले धौलागिरि आयुर्वेद अस्पतालमा समेत पुगेर सेवा प्रवाहको विषयमा जानकारी लिनुभएको छ । २५ शैयाको आयुर्वेद अस्पतालको रुपमा प्रदेश सरकारले स्तरोन्नती गरेको उहाँले जानकारी दिनुभयो ।
