बागलुङ, १ जेठ । बलेवामा अटो रिक्सा दुर्घटना हुँदा तीन जना घाईते भएका छन् । घाइतेमध्ये एक जनाको अवस्था गम्भीर रहेको जिल्ला प्रहरी कार्यालय बागलुङले जनाएको छ ।
शुक्रबार दिउँसो बागलुङ नगरपालिका–१३ सातबिसेबाट पानी ट्याङ्की तर्फ आउँदै गरेको ग.प्र. ०२००१ ह ०११९ नम्बरको अटो रिक्सा पानी ट्याङ्की–पैयुँपाटा भित्री पक्की सडक खण्डमा दुर्घटना भएको जिल्ला प्रहरी कार्यालय बागलुङका प्रहरी निरीक्षक तथा सूचना अधिकारी कमल जंग थापाले बताउनुभयो ।
दुर्घटनामा अटोरिक्सा चालक सहित सवार चार जनामध्ये तीन जना घाइते भएका हुन् ।
घाइते हुनेमा बागलुङ नगरपालिका–१३ पैयुँपाटा निवासी ४० वर्षीय चालक दिपेन्द्र पाण्डे, ६५ वर्षीया दिर्पा पाठक र ७२ वर्षीया डम्बर कुमारी रेग्मी रहनुभएको छ । घाईतेमध्य पाठकको अवस्था गम्भिर रहेको प्रहरीले जनाएको छ ।
घाइतेहरुलाई उपचारका लागि धौलागिरी प्रादेशिक अस्पताल बागलुङ ल्याइएको जिप्रका बागलुङका सूचना अधिकारी थापाले जानकारी दिनुभयो ।
