बागलुङ, १३ बैशख । बागलुङका धार्मिक तथा पर्यटकीय स्थलहरूमा शनिबार बृहत सरसफाई अभियान सम्पन्न भएको छ।
प्रसिद्ध बागलुङ भगवती मन्दिर परिसर, बाङ्गे चौर खेल मैदान, शहीद पार्क तथा गण्डकी गोल्डेन ब्रिज आसपासका क्षेत्रमा सरसफाई गरिएको हो ।
जिल्ला प्रहरी कार्यालय बाग्लुङ,ख विपद व्यवस्थापन गुल्म, बाग्लुङ नगरपालिका, परिवर्तन नेपाल अभियान, प्रबुद्ध युवा समूह, मिनाम लाङ्गाली रेवस भेँजा समूह, भकुन्डे टोल समाज, सगरमाथा कम्प्युटर सोलुसन तथा भूतपूर्व सैनिक बागलुङ लगायत विभिन्न संघ–संस्थाहरूको संयुक्त सहकार्यमा सरसफाई गरिएको थियो ।
सरसफाईमा सहभागीहरूले मन्दिर परिसरदेखि सार्वजनिक स्थलसम्म फैलिएको फोहोर संकलन गर्दै वातावरण स्वच्छ राख्न सामूहिक प्रतिबद्धता जनाएका थिए। सरसफाई अभियान मार्फत “जथाभावी फोहोर नफालौँ, डस्टबिनको प्रयोग गरौँ, स्वच्छ बाग्लुङ निर्माणका लागि परिवर्तन आफैबाट सुरु गरौँ” भन्ने चेतनामूलक सन्देश दिइएको थियो।
आफ्नो ठाउँ आफै सफा गरौँ, स्वच्छ बागलुङ, सफा बाग्लुङ निर्माण गरौँ” भन्ने सन्देश प्रवाह गर्नु अभियानको मुख्य उद्देश्य रहेका सरसफाई अभियानका प्रकास श्रेष्ठले जानकारी दिनु भयो । अभियानलाई बागलुङ नगरपालिका भित्रका धार्मिक तथा पर्यटकीय स्थलहरूमा निरन्तरता दिने श्रेष्ठको भनाई छ ।
