पोखरा, ३१ वैशाख । पोखरा महागनरपालिका वडा नं. २२ स्थित विश्व शान्ति स्तूपा नजिकै नगरबस दुर्घटना हुँदा २० जना घाइते भएका छन् ।
पुम्दीकोटदेखि छोरेपाटनतर्फ आउँदै गरेको ग १ ख ३८८६ नम्बरको नगर बस बुधबार दिउँसो साढे १ बजे दुर्घटना भएको हो । बस शान्ति स्तूपको पार्किङ स्थलभन्दा केही माथिको सडकमा पल्टिएको हो ।
बसमा करिब २५।२६ जना सवार थिए । उनीहरूमध्ये सामान्य एवं गम्भीर गरी २० जना घाइते छन् । तीमध्ये ५ जना गम्भीर घाइते रहेको वडा प्रहरी कार्यालय बैदामले जनाएको छ ।
घाइतेहरूलाई तत्काल उद्धार गरी उपचारका लागि पोखरा ल्याइएको छ। ब्रेक फेल भएर बस दुर्घटनामा परेको हुन सक्ने आशंका गरिएको छ।
उक्त बस रिजर्भ रहेको र त्यसमा भारतीय पर्यटक सवार रहेको स्थानीयले जानकारी दिएका छन्। प्रहरीले घाइतेहरूको विवरण संकलन गरिरहेको छ।
