काठमाण्डौं, २० असोज । फ्रेन्चाइज भलिबल लिग वात्सल्य एभरेष्ट महिला भलिबल लिगको उपाधि कर्णाली यश्वीजले जितेको छ।
त्रिपुरेश्वरस्थित राष्ट्रिय खेलकुद परिषदको कभर्ड हलमा शनिबार भएको फाइनल खेलमा ललितपुर क्विन्सलाई कर्णालीले ३।२ ले हराउँदै उपाधि जितेको हो।
कर्णालीले पहिलो सेट सहजै २५।१७ ले आफ्नो पोल्टामा पार्यो ।
दोस्रो सेटमा पनि ललितपुर विरूद्ध कर्णालीले दबाब बनायो। एक समय ९।१५ ले पछि परेको ललितपुरले खेललाई १८।२० सम्म पुर्यायो। तर यो सेट पनि २५।२० ले कर्णालीले जित्यो। खेलमा कर्णालीले २।० को स्पष्ट अग्रता बनायो।
२।० ले पछि परेको ललितपुरले २५।१२ ले तेस्रो सेट जित्दै खेललाई २।१ को स्थितिमा पुर्यायो।
चौथो सेटमा पनि ललितपुरले त्यही लयलाई निरन्तरता दियो। बिना दबाब चौथो सेट २५।१८ ले जित्यो। योसँगै खेल २।२ को बराबरीमा पुग्यो। खेलको निर्णय पाँचौ सेटबाट भयो।
पाँचौ सेट निकै प्रतिस्पर्धात्मक बन्यो। प्रतिस्पर्धात्मक खेलमा १५।१३ ले जित्दै कर्णालीले उपाधि जित्न सफल भएको थियो ।
टिम कर्णाली अपराजित रहँदै फाइनलमा पुगेको थियो।
