काठमाडौं , १८ भदौ । नेपालले एसिया कपमा आज विश्व क्रिकेटको पावर हाउस भारतसँग खेल्दैछ । खेल नेपाली समय अनुसार दिउँसो ३ : १५ मा पालेकेले इन्टरनेशल क्रिकेट स्टेडियममा सुरुहुनेछ । नेपालले आफ्नो क्रिकेट इतिहासमा भारतविरुद्ध खेल्दैछ ।
भारत नेपालको सबैभन्दा नजिकको छिमेकी हो । तर सिनियर स्तरमा भारतसँग भिड्न नेपालले २७ वर्ष पर्खनु पर्यो । नेपालले सन् १९९६ बाट अन्तर्राष्ट्रिय क्रिकेट खेल्न थालेको हो । भारत र पाकिस्तानसँग पहिलो पटक खेल्ने अवसर पाएको हो । भारत र पाकिस्तानसँग खेल्न पाउनुनै नेपाल जस्तो देशका लागि एउटा उपलब्धी हो ।
नेपालले आफ्नो पहिलो खेलमा पाकिस्तानसँग २ सय ३८ रनले पराजित भएको थियो । तर भारत र पाकिस्तानसँग खेल वर्षाको कारण रद्द भयो । यदि यस खेलमा नेपाल विजयी भएमा सुपर फोरमा पुग्नेछ । वर्षाले प्रभावित हुँदै रद्द भएमा वा नेपाल पराजित भएमा भने बाहिरिनुपर्ने हुन्छ ।
विश्व क्रिकेटका दुई उत्कृष्ट ब्याटर विराट कोहली र रोहित शर्मासँग खेल्ने दुर्लभ अवसर नेपाली खेलाडीले पाउनेछन् । सायद यी दुई खेलाडीसँगको खेल यो नै अन्तिम हुनसक्छ । अर्को पटक एसिया कपमा नेपालले स्थान बनाउँछ वा बनाउँदैन थाहा छैन ।
विराट कोहली पछिल्लो एक दशकयताका सर्वाधिक सफल ब्याटर भन्दा कुनै फरक नपर्ला । हरेक नेपाली बलरलाई कोहलीको विकेट सपना हुनेछ । कोहली नेपालविरुद्ध कसरी उत्रिन्छन् त्यो हेर्न बाँकी छ ।
रोहित, विराट सँगसँगै श्रेयस ऐयर, ईशान किशन र हार्दिक पान्ड्याले गर्दा भारतको मध्यक्रम पनि मजबुत छ । नेपाली खेलाडीको लागि यो ठूलो अवसर हो । धेरै नेपाली खेलाडीको आइपिएल खेल्ने सपना छ । त्यो सपना पूरा गर्न आज राम्रो गर्नुपर्ने हुन्छ ।
नेपाललाई गुमाउनु केहि छैन । हार स्वभाविक हो । तर आफ्नो उत्कृष्ट क्रिकेट भने देखाउन सक्नुपर्छ । कुशल भुर्तेल, रोहित पौडेल, आसिफ शेख र आरिफ शेख ब्याटर हुन् । कप्तान रोहित र कुशल भुर्तेल प्रमुख ब्याटर हुन् ।
पाल र भारतबीचको खेल हुने समयमा वर्षा हुने सम्भावना ८० प्रतिशत सम्म छ । वर्षा नेपालको ऐतिहासिक खेलमा बाधक बन्नसक्छ ।
