बागलुङ,३ असोज । बागलुङमा दुई हजार एक सय ८९ जना किशोरी एचपिभि खोप लगाइने भएको छ ।
बागलुङका दुई हजार एक सय ८९ जना किशोरीलाई पाठेघरको मुखको क्यान्सरविरुद्वको (एचपिभि) खोप लगाइने भएको प्रदेश जनस्वास्थ्य कार्यालय बागलुङले जनएको छ ।
असोज महिनाको दोश्रो साताभित्र दुई चरणमा गरी विद्यालय जाने कक्षा ६ मा अध्ययनरत र विद्यालय बाहिर रहेका १० वर्षका किशोरीलाई एचपिभि खोप लगाइने प्रदेश जनस्वास्थ्य कार्यालय बागलुङका खोप सुपरभाइजर राजु खत्रीले जानकारी दिनुभयो ।
खत्रीका अनुसार, गलकोटका २ सय ६६, जैमिनीका १ सय ८५, ढोरपाटनका ३ सय ५०, बागलुङ नगरपालिकाका ४ सय ६७, काठेखोलाका १ सय ३३, तमानखोलाका ९५, ताराखोलाका ६०, निसीखोलाका २ सय ५१, बडिगाडका ३ सय ४ र बरेङ गाउँपालिकाका ७८ जना किशोरीलाई एचपिभि खोप लगाइनेछ ।
विद्यालयबाहिर रहेका किशोरीलाई घरमै पुगेर खोप दिइने छ ।
एचपिभि खोप लगाउनेबारे जनस्वास्थ्यले जिल्लाका दशवटै पालिकाका स्वास्थ्य शाखा प्रमुखसँग अभिमुखीकरण कार्यक्रम सम्पन्न गरिसकेको छ । खोप लगाउनुपूर्व पालिकामा स्वास्थ्य संस्थाका प्रमुख र वडास्तरमा स्वास्थ्यकर्मीबिच अभिमुखीकरण कार्यक्रम हुनेछ ।
‘‘यो वर्ष एचपिभि खोप लगाउने जिम्मा स्थानीय तहलाई जिम्मेवारी दिएका छौं’’ खत्रीले भन्नुभयो, ‘‘लक्षित किशोरीलाई खोपमा समेट्न स्वास्थ्यकर्मीहरु विद्यालय र घरघरमा पुग्ने छन् ।’’
जनस्वास्थ्य कार्यालयले दक्षिण बागलुङका दुई पालिका जैमिनी र बरेङका लागि खोप पठाइसकेको छ भने अन्य पालिकामा पठाउने तयारी गरेको छ ।
खोपका लागि हरेक पालिकामा समय तालिका बनाइएको छ । गलकोट नगरपालिकामा असोज ४ देखि ७ र ताराखोला गाउँपालिकामा असोज ४ देखि ७ गतेभित्र एचपिभि खोप लगाइने छ ।
असोज दोस्रो हप्तादेखि बागलुङ, जैमिनी, ढोरपाटन नगरपालिका, काठेखोला, बरेङ, बडिगाड, निसीखोला र तमानखोला गाउँपालिका खोप लगाइने छ ।
आर्थिक वर्ष २०८१/०८२ मा १० देखि १४ वर्ष उमेर समूहका ११ हजार १ सय ७७ जना र गत वर्ष कक्षा ६ मा पढ्नेबाहेक १० वर्ष उमेर समूहका गरी ३ हजार ३ सय २ जना किशोरीलाई खोप लगाइएको थियो । यस वर्ष पनि तोकेको लक्ष्यअनुसार सबैलाई खोप लगाइनेछ ।
एचपिभि खोप अभियनमा नियमित खोप लगाउन छुटेका बालबालिकालाई जोड्न स्वास्थ्यकर्मीले घरदैलो गर्ने प्रदेश जनस्वास्थ्य कार्यालयले जनाएको छ ।
