बागलुङ ,१० साउन । बागलुङमा आईफोन पचाउनका लागि साथी हत्या गरेको खुलेको छ ।
बागलुङको बडिगाड गाउँपालिका–१ का आठ दिनदेखि बेपत्ता रहेका लजिन थापा साउन १ गते साँझ करिब ८ बजे घरनजिकै साथीको जन्मदिन मनाउन जाने भन्दै घरबाट निस्किएका थिए । त्यसयता सम्पर्कविहीन रहेका उनी शनिबार विहान मृत अवस्थामा फेला परेको प्रहरीले जनाएको छ ।
प्रहरीले थापासँग जन्मदिन मनाउन गएका चार जना साथीलाई नियन्त्रणमा लिएर घटनाबारे थप अनुसन्धानका क्रममा साथीको आईफोन पचाउनका लागि हत्या गरिएको तथ्य खुलेको जिल्ला प्रहरी कार्यालय बागलुङका डिएसपी रामेश्वर त्वातिले जानकारी दिनुभयो ।
अनुसन्धानका लागि जिल्ला प्रहरी कार्यालय बागलुङले बडिगाड–१ का २० वर्षीय रेमबहादुर विक, सोही ठाउँका १९ वर्षीय सुदिप विक, १६ वर्षीय अशिम वन र १५ वर्षीय ददि परियारलाई पक्राउ गरेको थियो ।
प्रहरीको प्रारम्भिक अनुसन्धानअनुसार घटनाको मुख्य कारण लजिनसँग रहेको आईफोन रहेको देखिएको छ । काठमाडौंबाट घर आएपछि लजिनले प्रयोग गरिरहेको आईफोनप्रति पक्राउ परेका साथीहरूको चासो बढेको र पटक–पटक फोन माग्दा नदिएपछि लुट्ने योजना बनाएको अनुसन्धानबाट खुलेको एसपि प्रसाईले जानकारी दिनुभयो । उहाँले जन्मदिन मनाएर फर्किने क्रममा एकान्त स्थानमा पुगेपछि योजनाअनुसार आक्रमण गरी हत्या गरिएको र घटनालाई लुकाउन शव खोल्सासम्म पु¥याएर फालिएको प्रहरीको प्रारम्भिक निष्कर्ष रहेको बताउनुभयो ।
लजिनको शव साउन ९ गते बिहान बडिगाड गाउँपालिका–१ स्थित मनेखोलाको खोल्सामा फेला परेको छ । ड्रोन क्यामेराको प्रयोग गरेर गरिएको खोजीका क्रममा शव फेला परेको प्रहरीले जनाएको छ ।
शवलाई पोस्टमार्टमका लागि धौलागिरी प्रादेशिक अस्पताल बागलुङमा राखिएको छ ।
