बागलुङ, ७ साउन । बागलुङका ७१ ७१ जना हिंसा प्रभावितलाई सेवा प्रदान गरिएको छ ।
बागलुङ नगरपालिकामा सञ्चालित हिंसा प्रभावित सेवा केन्द्रले आर्थिक वर्ष २०८२/८३ मा ७१ जना हिंसा प्रभावितलाई सेवा उपलब्ध गराएको सेवा केन्द्र व्यवस्थापन समितिका संयोजक तथा बागलुङ नगरपालिकाका उपप्रमुख राजु खड्काले जानकारी दिए ।
संयोजक खड्काका अनुसार सेवा लिनेमध्ये बागलुङ नगरपालिकाका ३३ जना, जैमिनी नगरपालिकाका ८, काठेखोला गाउँपालिकाका १०, ढोरपाटन नगरपालिकाका ३, तमानखोला गाउँपालिकाका ३, गलकोट नगरपालिकाका २, बडीगाड गाउँपालिकाका २, निसीखोला गाउँपालिकाका २, ताराखोला गाउँपालिकाका १, बरेङ गाउँपालिकाका १ तथा बागलुङ बाहिरका ६ जना रहेका छन्।
आर्थिक वर्ष २०८१/८२ मा ७२ जना तथा २०८०/८१ मा ९२ जनाले सेवा लिएका थिए। गत आर्थिक वर्षमा सेवा लिएकामध्ये ५२ जनालाई आश्रयसहितको सेवा, ५ जनालाई यातायात खर्च, ६ जनालाई लुगाकपडा, ५ जनालाई कानुनी उपचार तथा २ जनालाई जीविकोपार्जन अनुदान उपलब्ध गराइएको केन्द्रले जनाएको छ।
यस अवधिमा ४३ पटक तारेखमा सहजीकरण, ५ पटक सरोकारवालासँग समन्वय, ३ जनालाई ओसिएमसीमा सिफारिस, १ जनालाई संरक्षणका लागि सिफारिस, ९ वटा छलफल तथा मिलापत्र, ५ जनालाई जिल्ला कानुनी सहायता समितिमा सिफारिस तथा ७ पटक जिल्ला प्रहरी कार्यालयसँग समन्वय गरिएको थियो।
उपप्रमुख खड्काका अनुसार पछिल्लो समय हिंसा प्रभावितहरू सिधै सेवा केन्द्रमा पुगेर सहायता लिने क्रम बढ्दो छ। गत आर्थिक वर्षमा ६० जना सिधै सेवा केन्द्रमा पुगेका थिए भने ८ जना जिल्ला प्रहरी कार्यालय र ३ जना ओसिएमसीको सिफारिसमार्फत सेवा लिन आएका थिए।
सेवा केन्द्रमा दर्ता भएका घटनामध्ये ५ वटा शारीरिक हिंसा, ११ वटा मानसिक हिंसा, ७ वटा आर्थिक हिंसा र ११ वटा यौनजन्य हिंसासँग सम्बन्धित थिए। सेवा लिनेमध्ये जातिगत आधारमा ४२ जना दलित, ७ जना जनजाति तथा २२ जना अन्य समुदायका रहेका छन्।
हिंसा न्यूनीकरणका लागि बागलुङ नगरपालिकाले मनोसामाजिक परामर्शका विभिन्न कार्यक्रम सञ्चालन गरेको जनाएको छ। गत आर्थिक वर्षमा आयोजित सामूहिक मनोविमर्श कार्यक्रममा ७४४ जना सहभागी भएका थिए भने व्यक्तिगत रूपमा २७ महिला र २४ पुरुष गरी ५१ जनालाई मनोसामाजिक परामर्श सेवा प्रदान गरिएको थियो।
हिंसा प्रभावित सेवा केन्द्र सञ्चालन तथा व्यवस्थापनका लागि आर्थिक वर्ष २०८२र८३ मा संघीय सरकारबाट ५ लाख रुपैयाँ र गण्डकी प्रदेश सरकारबाट १० लाख रुपैयाँ गरी कुल १५ लाख रुपैयाँ खर्च भएको उपप्रमुख खड्काले जानकारी दिए।
