बागलुङ, २७ वैशाख । धौलागिरि प्रादेशिक अस्पतालले मृगौला तथा पिसाब, नशा र मानसिक रोग सम्बन्धी विशेषज्ञ सेवा प्रदान गर्न सुरु गरेको छ ।
प्रत्येक महिनाको अन्तिम शनिबार उक्त रोगको विशेषज्ञ सेवा दिन थालिएको हो ।
अस्पतालमा आउने सेवाग्राहीलाई नसर्ने रोगको विशेषज्ञ सेवा थालेपछि विरामीको सहज उपचार हुनुका साथै समय र पैसाको समेत बचत भएको धौलागिरि प्रमुख मेडिकल सुपरीटेण्डेन्ट डा. किरण तिवारीले जानकारी दिनुभयो ।
सामान्यतया यस किसिमको सेवामा स्वास्थ्य परीक्षण, परामर्श र आवश्यक उपचारको समेत व्यवस्था रहेको अस्पतालले जनाएको छ ।
गत महिनादेखि पोखरा स्वास्थ्य विज्ञान प्रतिष्ठानमा कार्यरत प्रमुख कन्सल्टेन्ट मिर्गौला रोग विशेषज्ञ डा. विकास खत्रीले अस्पतालमा सेवा प्रदान गर्न थालेका हुन् ।
साथै जिएमसि अस्पतालका न्यूरोसर्जन डा. याम रोका र पोखरा स्वास्थ्य विज्ञान प्रतिष्ठानका मनोचिकित्सक डा. सुन्दर रानाभाटले सेवा प्रारम्भ गर्नु भएको छ ।
डा. रानाभाटले महिनाको दोस्रो र अन्तिम शनिबार गरि महिनाको दुई पटक सेवा दिनु भएको छ ।
सेवा सुरु भएपछि ३१ जना मृगौला रोगका विरामी, ४० जना नशा रोगका विरामी र ५२ जना मानसिक रोगका विरामीले स्वास्थ्य सेवा लिएका थिए ।
दक्ष चिकित्सकको व्यवस्थापन नभएसम्म प्रतिष्ठानका र जिएमसि अस्पतालका चिकित्सक ल्याएर सेवा प्रवाह गर्न थालिएको र अस्पतालको लागि चाहिने आवश्यक दरबन्दी ल्याएर नियमित सेवा संचालन गर्ने लक्ष्य राखिएको धौलागिरि अस्पतालका अध्यक्ष श्रीप्रसाद शर्माले बताउनुभयो ।
