बागलुङ, २५ पौष । धौलागिरी प्रादेशिक अस्पताल बागलुङले एकै दिनमा पाँच जटिल किसिमका शल्यक्रियालाई सफलतापूर्वक सम्पन्न गरेको छ ।
गत बिहिबार अस्पतालको जेनेरल सर्जरी डिपाटमेन्टले हर्निया र एपेन्डाइटिसका बिरामीहरुलाई शल्यक्रिया गरेका थिए । शल्यक्रियामा सर्जन डा.शंकर लामिछाने र डा. आशिष बस्ताकोटीको महत्वपूर्ण भूमिका रहेको थियो ।
हर्निया जटिल बनेमा आपातकालीन शल्यक्रिया आवश्यक हुने र जीवनरक्षाका लागि पनि चुनौतीपूर्ण हुनसक्ने भएता पनि अस्पतालको टोलीले यसलाई सफलतापूर्वक नियन्त्रण गर्न सफल भएको डा. शंकर लामिछानेको भनाइ रहेको छ ।
लामिछानेले भन्नुभयो, “धौलागिरी प्रादेशिक अस्पतालले स्थानीय तहमै उच्चस्तरीय शल्यक्रिया सेवा प्रदान गर्दै स्वास्थ्य सुरक्षामा पनि महत्वपूर्ण योगदान दिँदै आएको छ र जटिल किसिमको उपचार र शल्यक्रिया बडिरहेको पनि छ जस्ले विस्तारै ठूलो ठाउँमा रिफर कम हुने विश्वास लियका छौ । ”
अस्पताल प्रमुख डा. किरण तिवारीले यस उपलब्धीले अस्पतालको शल्यक्रिया क्षमता र गुणस्तरीय सेवा प्रदान गर्ने सामथ्र्यलाई प्रमाणित गरेको बताउनुभयो ।
प्रशासनिक सुपरभाईजर सुयश सापकोटाले अस्पतालमा यस्ता सेवाहरू नियमित रूपमा उपलब्ध रहेको पनि जानकारी गराउनुभयो ।
