काठमाण्डौं, १२ असोज । विश्वकप विजेता वेस्ट इन्डिजलाई १९ रनले पराजित गर्दै नेपाली राष्ट्रिय क्रिकेट टोलीले ऐतिहासिक जित दर्ता गरेको छ।
दुई पटक (सन् २०१२ र २०१६)को टी–२० आई क्रिकेट खेलिसकेको फुल टेस्ट टोलीलाई नेपाली टोलीले इतिहासमा पहिलोपटक हराएको हो ।
पहिलो खेलमा जित हात पारेसँगै नेपालले ऐतिहासिक तीन खेलको टी–२० आई सिरिजमा १–० ले अग्रता बनाएको हो। नेपालले दिएको १ सय ४९ रनको लक्ष्य पछ्याएको वेस्ट इन्डिजले निर्धारित २० ओभरमा ८ विकेटको क्षतिमा १ सय २९ रन मात्र बनाउन सक्यो।
नेपालका लागि कुशल भुर्तेलले २ विकेट लिदाँ नन्दन यादव, ललित राजवंशी, रोहित पौडेल र करण केसीले समान एक विकेट आफ्नो पौल्टामा पारे ।
वेस्ट इन्डिजका लागि नभिन विदाइसीले बनाएको २२ रन नै सर्वाधिक रह्यो। अन्य व्याट्सम्यान नेपालको कसिलो बलिङसामु आफ्नो उत्कृष्ट प्रस्तुति देखाउन सकेनन् ।
टस जितेर वेस्ट इन्डिजले फिल्डिङ रोजेपछि ब्याटिङ गरेको नेपाली टोलीले निर्धारित २० ओभरमा ८ विकेटको क्षतिमा १ सय ४८ रनको योगफल तयार पारेको थियो।
नेपालका लागि कप्तान रोहित पौडेलले सर्वाधिक ३८ रनको योगदान दिए। उनले ३५ बलमा ३ चौका र १ छक्का सहयोगमा ३८ रन बनाउँदा नविन विडाइसेको बलमा क्याच आउट हुन पुगे।
२१ बलमा २ चौका र २ छक्का प्रहार गरेका कुशल मल्ल ३० रन बनाउँदा लामो सट खेल्ने धुनमा क्याच आउट नै हुन पुगे। नेपाली टोली एक समय ३।१ ओभरमा २–१२ को स्थितीमा हुँदा कुशल र रोहितले नेपालको पारी सम्हालेका थिए।
१६ बलमा २ छक्का सहयोगमा २२ रन बनाएका गुल्सन झा पनि क्याच आउट नै भए। ओपनर कुशल भुर्तेल ६ र आशिफ शेख ३ रनमा पेभेलियन फर्के।
दीपेन्द्र सिंह ऐरी १७ रन बनाउँदा क्याच आउट नै भए। सन्दीप जोरा ९ र करण केसी शून्य रनमा आउट भए।
नेपाली टोलीले १९औँ ओभरमा लगातार तीन विकेट गुमाउन पुग्यो। टोलीले १९औँ ओभरको तेस्रो बलमा दिपेन्द्रलाई, पाचौँ बलमा सन्दीप र अन्तिम बलमा करणलाई गुमाउन पुग्यो। सोमपाल कामी ६ नन्दन यादव ७ रनमा अविजित रहे।
वेस्ट इन्डिजका जेसन होल्डरले ४ विकेट लिए। नविनले ३ विकेट झारे। उनले आफ्नो स्पेलमा २९ रन दिए। अकिल होसेनले एक विकेट आफ्नो नाममा गरे।
सिरिजको दोस्रो खेल सोमबार र तेस्रो तथा अन्तिम खेल मंगलबार हुनेछ।
