बागलुङ, १९ जेठ । बागलुङमा जारी एसईई स्तरीय दोस्रो संस्करणको आदर्श कप छात्र तथा छात्रा फुटबल प्रतियोगिताको सेमिफाइनल समिकरण पूरा भएको छ ।
प्रतियोगिताको चौथो दिन आईतबार चिल्ड्रन लाईफ इङ्गलिस बोर्डिङ स्कुल, आदर्श विद्यामन्दिर माध्यमिक विद्यालय, गुराँस विद्या सदन र गरिमा आवासीय माध्यमिक विद्यालय विजयी हुँदै अन्तिम चारमा प्रवेश गरे ।
आईतबार भएको पहिलो क्वाटरफाइनल खेलमा चिल्ड्रेन लाईफले प्रिसियस एकेडेमीलाई १–० गोलअन्तरले पराजित गर्यो । खेलको ९ औ मिनेटमा प्राप्त पेनाल्टीमा विशाल थापाले गोल गर्दै चिल्ड्रेन लाईफको अन्तिम चारको स्थान पक्का गरे ।
आईतबारको दोस्रो खेलमा कप्तान दिवस थापाको गोलको मद्धतमा गुराँसले सनराइज आवासीय माध्यमिक विद्यालयलाई १–० गोलअन्तरले पराजित गर्यो । दिवसले खेलको २६ औँ मिनेटमा गरेको हेडिङ गोल नै जितमा निर्णायक बन्यो ।
आईतबार भएको तेस्रो खेलमा आयोजक आदर्श विद्यामन्दिर माध्यमिक विद्यालय (नीलो)ले सुझाव बानियाँको ह्याट्रिकको मद्धतमा न्यू एभरेष्ट एकेडेमी (ए)लाई ४–० को फराकिलो गोलअन्तरले पराजित गर्यो । एकतर्फ खेलमा आदर्शका सुझावले खेलको ७ औं, २२ औं र २४ औं मिनेटमा गोल गर्दै ह्याट्रिक पूरा गरे । निकै फितलो खेल प्रदर्शन गरेको एभरेष्टले खेलको ८ औं मिनेटमा एक आत्मघाती गोलको सामना गर्नुपर्यो ।
यस्तै चौथो खेलमा ट्राइबेकरमा रुद्रेपिपल माध्यमिक विद्यालयलाई ५–३ गोलअन्तरले पराजित गर्दै गरिमा आवासीय मावि सेमिफाइनल प्रवेश गर्यो ।
निर्धारित समयमा रुद्रेपिपलका चन्दन माझी र गरिमाका प्रिन्स कुँवरले एक÷एक गोल गरेपछि खेल ट्राइबेकरमा धकेलिएको थियो । खेलको ७ औं मिनेटमा चन्दनको गोलबाट अग्रता लिएको रुद्रेपिपलले जोगाउन सकेन । गरिमाका प्रिन्सले खेलको २० औं मिनेटमा गोल गर्दै खेललाई बराबरीमा पु¥याए ।
ट्राइबेकरमा रुद्रेपिपलका चन्दन माझी गोल गर्न चुक्दा टोलीले ३–५ गोलको हार व्यहोर्नुपर्यो । पेनाल्टीमा रुद्रेपिपलका गणेश बोसेल, सुमन माझी र कुशल गर्वुजा तथा गरिमाका सविन थापा, अप्सन गौतम, गगन थापा, प्रिन्स कुँवर र चिराग रोकाले गोल गरे ।
सोमबार छात्र र छात्रा तर्फका सेमिफाइनलका खेल हुने आयोजक आदर्श स्पोर्टस् क्लबका अध्यक्ष राजेश केसीले जानकारी दिनुभयो ।
छात्र तर्फ पहिलो सेमिफाइनल खेल गरिमा आवासिय मावि विरुद्ध चिल्ड्रेन लाईफ र दोस्रो सेमिफाइनल आदर्श विद्यामन्दिर मावि विरुद्ध गुराँस विद्या सदन बिच हुनेछ भने छात्रा तर्फ पहिलो सेमिफाइनल न्यू ओयसिस एकेडेमी विरुद्ध रुद्रेपिपल माध्यमिक विद्यालय र दोस्रो सेमिफाइनल आदर्श विद्यामन्दिर विरुद्ध चिल्ड्रेन लाईफ बिच हुने बताउनुभयो ।
