बागलुङ, ६ साउन । बागलुङमा सुत्केरीको हेलिकप्टर मार्फत उद्धार गरिएको छ ।
बागलुङको निसीखोला गाउँपालिका–३ का ३९ वर्षीया सुत्केरी मीना सुनारको आन्तरिक रक्तस्रावका कारण स्वास्थ्य अवस्था जटिल बनेपछि सेनाको हेलिकप्टरबाट उद्धार गरि थप उपचारका लागि मणिपाल शिक्षण अस्पताल पोखरा पठाइएको छ ।
मङ्लबार बोहरागाउँ स्वास्थ्य चौकीमा सुत्केरी हुनुभएकी सुनारलाई आज बिहान बुर्तिबाङ अस्पताल ल्याइएको थियो । प्रारम्भिक जाँच गरि थप उपचार लागि मणिपाल शिक्षण अस्पताल पठाइएको अस्पतालका निमित्त मेडिकल सुपरीटेन्डेन्ट डा अविनाश पोखरेलले बताउनुभयो ।
“परीक्षणका क्रममा उहाँको पेटमा रगत जमेको पाइएको छ, यहाँ उपचार हुन नसक्ने भएपछि सेनाको हेलिकप्टरमार्फत मणिपाल शिक्षण अस्पताल पठाइएको छ”, उहाँले भन्नुभयो । सुनारले प्राकृतिक रुपमै शिशुलाई जन्म दिनुभएपनि गए रातिदेखि अत्यधिक पेट दुख्नेलगायतका समस्या देखिएको थियो ।
