बागलुङ, ३ साउन । जिल्ला ट्राफिक प्रहरी कार्यालय बागलुङले पछिल्लो तीन वर्षयताकै सबैभन्दा कम राजस्व संकलन गरेको छ।
जिल्ला ट्राफिक प्रहरी कार्यालय बागलुङले आर्थिक वर्ष २०८२/८३ मा ट्राफिक नियम उल्लङ्घन गर्ने १२ हजार ५सय ५१ सवारीसाधनमाथि गरिएको कारबाहीबाट एक करोड छ लाख चार हजार रुपैयाँ राजस्व संकलन गरेको छ।
जिल्ला ट्राफिक कार्यालय बागलुङका प्रमुख एवम् प्रहरी नायव निरीक्षक सन्तोष ज्ञवालीका अनुसार उक्त अवधिमा सबैभन्दा बढी कारबाही कार, जिपमा गरिएको जानकारी दिनुभएकाे छ । जस अन्तरगत ६ हजार ७०५ वटा सवारी कारबाहीमा पर्दा ५९ लाख ९ हजार ५०० रुपैयाँ राजस्व संकलन भएको छ।
यस्तै, ट्रक ९सय२२ वटा सवारी कारबाहीबाट ८ लाख ८६ हजार रुपैयाँ, बसका ६७५ वटा कारबाहीबाट ५ लाख १३ हजार रुपैयाँ, ट्याक्टरका ५सय५९ वटा कारबाहीबाट ४ लाख २४ हजार रुपैयाँ तथा मोटरसाइकलका २ हजार ५९० वटा कारबाहीबाट २० लाख ३३ हजार ५०० रुपैयाँ राजस्व संकलन भएको छ।
त्यसैगरी, अन्य १ हजार १०० वटा सवारीसाधनमाथि गरिएको कारबाहीबाट ८ लाख ३८ हजार रुपैयाँ राजस्व उठेको जिल्ला ट्राफिक प्रहरी कार्यालय बागलुङले जनाएको छ।
गत आर्थिक वर्ष २०८१/८२ मा १५ हजार ८५३ वटा सवारीसाधनबाट एक करोड ३१ लाख ६० हजार रुपैयाँ राजस्व संकलन भएको छभने आर्थिक वर्ष २०८०/८१ मा १६ हजार ३७८ वटा सवारीसाधनबाट एक करोड २१ लाख ७१ हजार ५०० रुपैयाँ राजस्व संकलन भएको थियो।
